Qonaevta jasóspirimder adamdardy aıaýsyz soqqyǵa jyǵyp, vıdeoǵa túsirgen

QONAEV. KAZINFORM — Qonaevta polıtseıler er adamdardy uryp-soǵyp jáne sol áreketerin vıdeoǵa túsirgen jasóspirimderdi ustady.

Áleýmettik jelide bir top jastyń ótip bara jatqan adamdardy aıaýsyz uryp-soqqan vıdeosy tarady.

Kadrdan kámeletke tolmaǵandar, onyń ishinde jas qyz mas kúıinde otyrǵan eresek er adamǵa tıisip, keıin ony tepkilep jatqanyn kórýge bolady.

Almaty oblysynyń polıtsııa departamenti vıdeodaǵy jastardyń anyqtalyp, Qonaev polıtsııa basqarmasyna jetkizilgenin málimdedi.

«Qazirgi ýaqytta qalalyq polıtsııa buzaqylyq faktisi boıynsha qylmystyq is qozǵady. Qajetti saraptamalar taǵaıyndalyp, tergeý amaldary júrgizilip jatyr. Qylmystyq-protsestik kodekstiń 201-babyna sáıkes, ózge málimetter jarııa etilmeıdi», - dep habarlady Almaty oblystyq polıtsııa departamentiniń baspasóz qyzmeti.