Qonaevta jas sarbazdar Otanyna adal bolýǵa ant berdi

QONAEV. KAZINFORM — Oblystyq mańyzy bar Qonaev qalasynyń ortalyq alańynda áskerı ant berýge arnalǵan saltanatty rásim ótti. Bul týraly Qorǵanys mınıstrliginiń baspasóz qyzmeti habarlady. 

58012 áskerı bóliminiń jas sarbazdary komandırlerdiń, Qarýly kúshter ardagerleriniń jáne týystarynyń qatysýymen áskerı boryshqa adal bolýǵa, táýelsizdikti, eldiń konstıtýtsııalyq qurylysyn, onyń halqyn jáne zańdy túrde saılanǵan Prezıdentti batyl qorǵaýǵa ant berdi. 

– Anttyń tereń maǵynasy bar. Budan bylaı Sizderdiń barlyq áreketińiz ben isterińiz osy saltanatty anttyń talaptaryna sáıkes keledi. Armııa sizderdiń erkińizdi shyńdap, fızıkalyq turǵydan nyǵaıtyp, patrıottyq senimderińizdi qalyptastyratynyna senimdimin. Munda sizder azamattyq ómirde paıdaly bolatyn mamandyq ala alsyzdar, - dedi 58012 áskerı bóliminiń komandıri polkovnık Qanat Majıev.

Osy kúzde shaqyrylǵan Almaty, Jetisý jáne Túrkistan oblystarynyń sarbazdary jas jaýynger kýrsynan ótti. Olar jalpyáskerı jarǵylardy zerdelep, qarýdyń taktıkalyq jáne tehnıkalyq sıpattamalarymen tanysty, saptyq jáne atys daıyndyǵynan ótti. 

Alańǵa jınalǵandarǵa áskerı qyzmetshiler qoıan-qoltyq urys elementterin kórsetti. Ashyq aspan astynda zamanaýı qarý-jaraq pen tehnıkanyń kórmesi uıymdastyryldy. 

Áskerı bólim komandıri ata-analarymen áńgimelesti. Ol uldarynyń qaıda, qandaı jaǵdaıda qyzmet etetinin jáne qandaı bólimshelerge bólingenin habardar etti. Іs-shara sońynda jas sarbazdar týystary men jaqyndarynyń súıemeldeýimen alǵashqy seıilge shyqty.