Qonaevta jańa kazınolar ashylýy múmkin

QONAEV. KAZINFORM — Qazirgi tańda Qonaev qalasynda 5 kazıno resmı jumys istep tur.

Kazinform tilshisiniń suraǵyna jaýap bergen Qonaev ákimi Ashat Berdihanov qumar oıyn salasynda úsh myńnan astam adam jumys isteıtinin aıtty.

— Qazirgi ýaqytta bizde bes kazıno jumys istep tur. Jabylǵan nysandar týraly aqparatym joq. Barlyq jumys istep turǵan kazıno qalypty jaǵdaıda, úsh myńnan asa adam jumyspen qamtylǵan, — dedi ol.

Ákimniń aıtýynsha, qumar oıyn bıznesinen túsetin salyqtyń negizgi bóligi respýblıkalyq bıýdjetke, al qalǵany jergilikti bıýdjetke túsedi. Ashat Berdihanov jańa kazıno ortalyqtarynyń ashylýy týraly da pikir bildirdi.

— Biz ınvestorlardyń naqty josparlaryn bile almaımyz. Degenmen, eki ınvestor bul jerde qosymsha kazıno ashqysy keletinin málimdedi. Alaıda, barlyq nysan qoldanystaǵy zańnamaǵa saı kelýi jáne qajetti lıtsenzııalarǵa ıe bolýy tıis, — dep atap ótti ákim.

Eske salaıyq, buǵan deıin úsh oblysta tek sheteldikterge arnalǵan kazınolar ashylatynyn jazǵanbyz.