Qonaevta sý jelisine qatysty múlik daýy shyqty: depýtat prokýrormen kezdesti
QONAEV. KAZINFORM — Almaty oblysyna barǵan Májilis depýtaty Ashat Raqymjanov Qonaev qalasynyń prokýrory Jánibek Jaqaevpen kezdesti. Talqylaýdyń negizgi taqyryby «Qapshaǵaı-Altyn Alma» tutynýshylyq baqsha kooperatıviniń (TBK) tóńireginde birazdan beri jalǵasyp jatqan múlik daýy, sondaı-aq kommýnaldyq ınfraqurylym obektilerin basqarýdaǵy zańsyz delingen keıbir áreketterge qatysty máseleler boldy. Bul týraly Májilistiń baspasóz qyzmeti málim etti.
Kezdesýde birneshe jyldan beri ózderiniń múlik quqyǵy buzylǵanyn aıtyp júrgen kooperatıv músheleriniń ótinishteri qaraldy. Talqylaýǵa qalalyq polıtsııanyń, jergilikti ákimdiktiń ishki saıasat, turǵyn úı-kommýnaldyq sharýashylyq basqarmalarynyń ókilderi, sondaı-aq «Qapshaǵaı-Altyn Alma» tutynýshylyq baqsha kooperatıviniń músheleri qatysty.
«Qapshaǵaı-Altyn Alma»TBK ókilderiniń aıtýynsha, daý kooperatıv músheleriniń qarajaty esebinen salynǵan jáne kútim jasalǵan, uzyndyǵy 3 600 metrge jýyq sý jelisine qatysty bolyp otyr. Keıinnen atalǵan nysan resimderdiń zańdylyǵy kúmándi jaǵdaılarda jáne quqyqtardyń aýysýy tıisti túrde tirkelmeı, úshinshi tulǵalardyń paıdasyna resimdelgeni aıtylady.
Ashat Raqymjanov bul jaǵdaıdy zerdeleý kezinde múlikti resimdeýdiń zańdylyǵyna qatysty salmaqty suraqtar týyndaǵanyn aıtty.
— Biz jaǵdaıdy egjeı-tegjeıli qarastyra kelip, jaı seriktestikter dep atalatyn múlikti resimdeý zańdylyǵyna qatysty kóptegen máselelerdi baıqadyq. Qazirgi tańda zańnamany saqtamaý belgileri bar deýge bolady, — dedi depýtat.
Onyń aıtýynsha, jaı seriktestikter qurý hattamalaryn resimdeý protsesi men ondaǵy qoltańbalardyń shynaıylyǵyna qatysty jaıt erekshe nazar aýdaryp otyr.
Kezdesý barysynda turǵyndardyń 1998 jyly óz esebinen salǵan sý qubyry jelilerin berýi máselesi de qozǵaldy. Ashat Raqymjanov atap ótkendeı, turǵyndar sý jelilerin óz kúshimen salyp, oǵan kútim jasady, shyǵyndaryn kóterdi jáne salyq tóledi. Biraq keıinnen bul múlik úshinshi tarapqa berilgen. Onyń pikirinshe, jaı seriktestikter qurý kezinde quqyq buzýshylyqtar bolǵan jaǵdaıda bul resimdeý protsesi júrgizilmeýi kerek edi.
Jıyn qorytyndysy boıynsha Qonaev qalasynyń prokýratýrasy jaǵdaıdy baqylaýǵa alǵanyn jetkizdi. Qadaǵalaýshy organnyń aldyna osy istiń barlyq mán-jaıyn, sonyń ishinde kondomınıým nysandaryn resimdeý men menshik ıeleriniń quqyn qorǵaýǵa qatysty jaıttardy qaıtadan jan-jaqty qaraý máselesi qoıyldy.
— Negizgi mindet — ádildikti qaıta ornatý. Infraqurylymǵa qarajat salǵan adamdar óz múddelerin qorǵaýǵa jáne ketken shyǵyndaryn óteýge quqyly. Barlyq sheshim tek quqyq negizinde qabyldanýǵa tıis, — dep atap ótti Ashat Raqymjanov.
Kezdesý barysynda depýtat baý-baqsha seriktestikterin memlekettik qoldaý kúsheıetinine toqtaldy. Partııanyń bastamalary azamattardyń ótinishterine jáne saıajaı birlestikteriniń jergilikti jerlerde kezdesetin naqty problemalaryna negizdelgenin aıtty.
Depýtat sondaı-aq óńirlerge jumys saparlary, saılaýshylarmen kezdesýler jer-jerdegi júıeli problemalardy anyqtaýǵa, oǵan qoldanystaǵy zańnama sheńberinde memlekettik organdardyń nazaryn aýdarýǵa múmkindik beretinin atap ótti.
Májilis depýtattarynyń óńirlerdegi kezdesýleri 5-13 qańtar aralyǵynda jalǵasady. Jumys saparlary barysynda AMANAT, Aýyl, Aq jol, JSDP, QPK jáne Respublica saıası partııalarynyń parlamenttik fraktsııalarynyń depýtattary saılaýshylardy qabyldanǵan zańdar týraly habardar etedi, olardyń jergilikti jerlerde qoldanylý barysyn zerdeleıdi jáne azamattardy tolǵandyratyn ózekti máseleler men problemalardy tyńdaıdy.
Eske sala keteıik, buǵan deıin Parlament Májilisiniń depýtaty Aıdarbek Qojanazarov Qazaqstannyń barlyq aýylynda tabysty kooperatıvter qurýǵa negiz bar ekenin aıtqan edi.