Qonaevta strategııalyq mańyzy bar alty nysan salynyp jatyr
QONAEV. KAZINFORM – Almaty oblysynyń ortalyǵy Qonaev qalasynda alty birdeı strategııalyq mańyzy bar ákimshilik ǵımarattyń qurylysy júrip jatyr. Bul nysandar qalany zamanaýı ákimshilik ortalyq retinde tanytyp, shahardyń jańa kelbetin qalyptastyrýǵa serpin bermek, dep habarlaıdy jergilikti ákimdiktiń baspasóz qyzmeti.
Oblys ákimi Marat Sultanǵazıev qurylys qaınap jatqan alańdarǵa arnaıy baryp, jumys barysymen tanysty. Aımaq basshysy eń aldymen sapaǵa erekshe nazar aýdaryp, nysandardy belgilengen merzimde aıaqtaýdy tapsyrdy.
Úkimet qaýlysyna sáıkes qazir Qonaev qalasynda Oblystyq sot, Polıtsııa departamenti, Ulttyq qaýipsizdik komıteti, vedomstvolyq organdarǵa arnalǵan ákimshilik ǵımarattar men Departamentter úıi salynyp jatyr. Barlyǵy derlik «Almaty – Óskemen» tasjolynyń boıynda ornalasqan. Sondaı-aq oblystyq muraǵat pen Almaty oblysy ákimi apparatynyń avtokólik kesheni jáne qalalyq №6, № 7 jaǵajaılarda kýrorttyq-oıyn-saýyq nysandary boı kóterýde.
Merdigerlermen júzdesken Marat Eleýsizuly jumysshylar men tehnıka sanyn kóbeıtip, sapaly ári ónimdi jumys isteý keregin aıtty. Kelisim boıynsha merdigerler qurylysty óz qarajaty esebinen bastaıdy, soǵan sáıkes keıin avanstyq tólemder jasalady. Búginde atalǵan nysandarda jer asty jumystary júrgizilip, irgetasy qalanýda. Máselen, Polıtsııa departamenti salynatyn alańda eski ǵımarattar buzylyp, qurylys qaldyqtary shyǵarylyp jatyr. Ǵımarattyń aýdany 22 myń sharshy metrden asady. Nysan úsh-alty qabatqa deıingi ártúrli bıiktiktegi segiz bloktan turady. Onda ınjenerlik-tehnıkalyq qyzmetkerler eńbek etip, gıdrobalǵamen jabdyqtalǵan jáne tıeý jumystaryna arnalǵan ekskavator men samosvaldar jumys istep tur.
Arnaıy memlekettik organdarǵa arnalǵan ákimshilik ǵımarattyń jalpy aýdany 12 168 sharshy metrdi quraıdy. Ǵımarat 5 qabattan jáne jertóleden turady. Qurylys alańynda 25 jumysshy men alty tehnıka jumyldyrylǵan.
Vedomstvolyq baǵynysty uıymdarǵa arnalǵan ákimshilik ǵımarat 4 jáne 6 qabatty eki bloktan turady. Qazirgi tańda qazanshuńqyr qazý jumystaryna 10-nan astam adam men 7 birlik tehnıka tartylǵan.
Departamentter úıi kúrdeli kópýnktsıonaldy 4 blokqa bólingen. Joba boıynsha ǵımaratta qyzmettik bólmeler, májilis zaldary, ashana, medpýnkt, arhıv jáne tehnıkalyq úı-jaılar ornalasady. Nysanda 6 ınjenerlik-tehnıkalyq qyzmetker men 13 monolıtshi jumys isteýde. Qazirgi tańda irgetasyn qalaý úshin daıyndyq qyzý júrip jatyr.
Al oblystyq Muraǵat ǵımaratynda gıdrooqshaýlaý, irgetasyn ornatý jumystary júrgizilýde. Ǵımarattyń aýdany – 8,4 myń m². Bolashaqta munda 300-den astam maman jumys isteıdi. 2 000 000-nan astam qundy qujattardy saqtaýǵa bolady. Soǵan sáıkes ǵımaratta órtke tózimdi materıaldar qoldanylýda.
Marat Eleýsizuly sondaı-aq Almaty oblysy ákimi apparatynyń avtokólik kesheni men Qapshaǵaı sý qoımasy jaǵasyndaǵy halyqaralyq deńgeıdegi kýrorttyq-oıyn-saýyq nysandarynyń jaı-kúıimen de tanysty. Avtoturaqqa 100-ge jýyq kólik sııady. Aýmaǵy shamamen úsh gektar bolatyn bul nysanda memlekettik mekemelerdiń kólikterine qyzmet kórsetetin ákimshilik jáne tehnıkalyq bólmeler bolady. Al atalǵan jaǵalaýlarda qonaqúı, attraktsıondar saıabaǵy, akvapark, oıyn alańy, SPA salynady. Ol úshin 24 mlrd teńge ınvestıtsııa tartylǵan. Nátıjesinde 350 jańa jumys orny ashylady dep kútilýde.
Oblys ákimi bul ǵımarattar tarıhı mańyzy zor ári qalanyń kórkin kirgizetin mańyzdy jobalar ekenin erekshe atap ótti.
«Jańa oblys ortalyǵynda zaman talabyna saı, sapaly ári kózdiń jaýyn alatyn ádemi ǵımarattar boı kóterýi tıis. Úkimet qaýlysymen bekitilgen keshendi damý josparyna sáıkes, senimdi merdiger retinde sizderdi tańdadyq. Eger jumys baıaýlaıtyn bolsa ne talaptarǵa saı kelmese, merdigerdi aýystyrýǵa týra keledi. Sondyqtan jumysqa úlken jaýapkershilikpen kirisý kerek», – dedi oblys ákimi.
Jospar boıynsha atalǵan nysandardyń qurylysy kelesi jyly aıaqtalyp, paıdalanýǵa beriledi.
