Qonaevta paıdalanylmaı jatqan 7 myń gektar jer bar
QONAEV. KAZINFORM - Qonaev qalasynyń Bas josparyna saı jumys júrgizý úshin shahardaǵy jer ýchaskeleriniń barlyǵyna monıtorıng júrgizilip, túgendeledi. Bıyl paıdalanylmaı jatqan 7000 gektar jerdi memleket menshigine qaıtarý josparda bar.
Almaty oblysy ákimdiginen atap ótkendeı, Qonaev qalasynda problemalyq birneshe jer ýchaske bar.
«Mysaly, 18 shaǵyn aýdanda mádenı oıyn-saýyq ortalyǵyna arnalǵan jerdiń nysanaly maqsaty turǵyn úı qurylysyna ózgerip ketken. Qazir munda aýmaǵy 0,10 gektardan 6 jer ıesi bar. Buǵan deıin osy jerdegi aǵashtardy kesý jáne qurylys jumystary ákimdik tarapynan toqtatylǵan bolatyn. Bul máseleni jer ıelerine basqa shaǵyn aýdannan jer berý arqyly sheshý kózdelip otyr», - dep atap ótti ákimdikten.
Sonymen qatar Indýstrıalnaıa kóshesi 108 V ýchaskesi 2021 jyly rásimdelgen. Qazir munda kafe salynyp jatyr. Alaıda kórshiles jer paıdalanýshylardan aryz-shaǵym túsken. Sondyqtan Almaty oblystyq Jer resýrstaryn basqarý departamenti bergen talap-aryz negizinde sot protsesi Qonaev qalalyq sotynda qaralyp jatyr. Budan bólek, akvapark janyndaǵy paıdaǵa aspaı jatqan jer, jol salynýy tıis jerge basqa nysan salynyp jatqan aýmaq ta qala ákimdiginiń baqylaýyna alyndy.
«Qonaev qalasynyń Bas josparyna saı jumys júrgizý úshin shahardaǵy jer ýchaskeleriniń barlyǵyna monıtorıng júrgizilip, túgendeledi. Bıyl paıdalanylmaı jatqan 7000 gektar jerdi memleket menshigine alý josparlanǵan, onyń 2 myńnan astam gektary qaıtarylyp alyndy», - dep habarlady ákimdikten.
