«Qonaevta oqýshyny ólimshi etip sabaǵan» degen aqparat shyndyqqa janaspaıdy – ákimdik

QONAEV. KAZINFORM – Áleýmettik jelide Qonaevta oqýshy balanyń qatarlastarynan taıaq jep, jan saqtaý bólimine túskeni týraly málimet tarady. Qala ákimdigi bul aqparatty joqqa shyǵardy.

– Qonaevta oqýshyny ólimshi etip sabaǵan degen aqparat- feık. Oqýshy aýrýhanaǵa «hımııalyq antıseptıkpen ulaný» dıagnozymen túsken. Qazir onyń jaǵdaıy turaqty dep baǵalanyp otyr. Em qabyldap jatyr, – dep habarlady qala ákimdiginiń baspasóz qyzmeti.

Qonaev qalalyq bilim bólimi orta mektep-gımnazııasyndaǵy tártiptik jaǵdaıǵa qatysty komıssııa qurylǵanyn atap ótti.

– Aıta keteıik, Qonaevta buǵan deıin kópirdiń astynda tóbeles bolǵany týraly derek tirkelmegen. Ózine-ózi qol jumsamaq bolǵan bala oqýda ozat, ortasynda syıly oqýshy. Jýrnalısterden jáne Qazaqstan halqynan resmı aqparat kózderine ǵana senýlerińizdi suraımyz. Jalǵan aqparat taratý úshin QR Zańnamasy aıasynda ákimshilik jaza qarastyrylǵanyn esterińizge salamyz, - dep qosty ákimdikten.

Sondaı-aq oqýshynyń anasy tóbeles bolǵanyn joqqa shyǵaryp, beınejazba túsirdi.

– Osy jyldyń 31 qańtarynda kámeletke tolmaǵan ulym jergilikti aýrýhanaǵa tústi. Qalanyń kireberis kópiriniń astynda ulymdy eshkim soqqyǵa shyqqan joq jáne eshqandaı toptyq tóbeles bolǵan joq, – delingen beınejazbada.

Polıtsııa basqarmasy málim etkendeı, ózin-ózi óltirýge deıin jetkizý deregi boıynsha qylmystyq is qozǵaldy. Qazir bolǵan oqıǵanyń barlyq mán-jaılaryn tolyq jáne jan-jaqty zertteý úshin barlyq qajetti tergeý áreketteri júrgizilip jatyr.

Eske salaıyq, buǵan deıin Almaty oblysynda oqýshy belgisiz jaǵdaıda ýlanyp qalǵany týraly jazǵan edik.