Qonaevta máslıhat depýtattaryn saılaý ótip jatyr
QONAEV. KAZINFORM – Qonaevta shyǵyp qalǵan máslıhat depýtatynyń ornyna halyq qalaýlysyn saılaý ótip jatyr.
Qonaev qalasy ákimdiginiń málimetinshe, jalpy 2 650 adam daýys berýi tıis. № 951 saılaý ýchaskesiniń tóraıymy Aıgúl Aqtanova saılaýda eshqandaı zańbuzýshylyq bolmaǵanyn aıtty.
Eń birinshi bolyp daýys bergenderge syı-sııapattar tabys etildi. Bul joly saılaýǵa alǵash ret 14 adam qatysyp otyr. Olardyń biri – Armanjan Oryntaı.
«Jaqynda 18 jasqa toldym. Búgin saılaýǵa birinshi ret qatystym. Ár saıası naýqan – eldiń erteńin sheshedi. Sondyqtan halyq mundaı sharalardan qalmaýy tıis . Búgin saılanǵan depýtat jurttyń máselesin sheshýde kóp eńbek sińiretinine senemin», - dedi ol.
Sondaı-aq qala turǵyny Sáýle Sarsabekova da saılaý jóninde pikir bildirdi.
«Osy ýaqytqa deıin Prezıdent saılaýyna da, depýtattardy da saılaýǵa qatystym. El tańdaý jasaǵan jerde bolashaqtaǵy maqsat-múddeler aıqyndalyp, keleshekke senimdilik artady. Ózim ǵana emes, otbasyma da saılaýdyń mán-mańyzyn túsindirip otyramyn. Jumylǵan judyryqtaı áreket etsek qana talaı túıin tarqatylady. Búgin saılanǵan depýtat óz isine berik azamat bolady dep úmittenemin», - dedi ol.
Aıta keteıik, depýtattyqqa úmitker retinde 3 azamat tirkelgen. Olar:
1. Nurqadyrov Serik Nurqadyruly – 1975 jyly týǵan, Almaty oblysy máslıhatynyń apparat basshysy. Qonaev qalasynyń turǵyny, ulty – qazaq, «AMANAT» partııasy usyndy.
2. Chımchıkov Byrjan Qurmanjanuly – 1967 jyly týǵan, «Qapshaǵaı ATO» JShS dırektory, ulty – qazaq, kandıdat ózin-ózi usyndy.
3. Kaplıýkov Igor Nıkolaevıch – 1966 jyly týǵan, ózin-ózi jumyspen qamtýshy, Qonaev qalasynyń turǵyny, ulty – orys, ózin-ózi usyndy.
