Qonaevta mas kúıinde jol apatyn jasaǵan júrgizýshi bir aıǵa qamaldy
QONAEV. KAZINFORM – Qonaevta kólik júrgizý quqyǵynan aıyrylǵan azamat rólge mas kúıde otyryp, jol apatyn jasady.
Almaty oblysy Qonaev qalasynyń ákimshilik quqyq buzýshylyqtar jónindegi mamandandyrylǵan aýdanaralyq sotynda E.-ge qatysty ÁQBtK-niń 608-babynyń 6-bóligi jáne 611-babynyń 3-bóligi boıynsha ákimshilik is qaraldy.
Sot anyqtaǵandaı, quqyq buzýshy E. 23 qańtar kúni shamamen saǵat 8:00-de kólikti basqarý quqyǵy joq bola tura, Qonaev qalasynda «Kia Rio» markaly kóligin mas kúıde júrgizip, araqashyqtyqty saqtamaı, aldynda kele jatqan «Toyota Camry» markaly kóligine soǵylǵan. Sonyń saldarynan ınertsııa kúshinen «Toyota Camry» kóligi «Chevrolet Onix» markaly kólikke soqtyǵysqan.
Qozǵalysyn jalǵastyrǵan «Kia Rio» kóligi joldyń shetinde turǵan «Toyota Land Cruiser Prado» markaly kóligine soǵylǵan.
Jol apaty saldarynan kólik quraldary zaqymdalyp, materıaldyq shyǵyn keltirilgen. Sonymen qatar, quqyq buzýshy oqıǵa ornynan ketip qalǵan.
Sot otyrysynda E. jasaǵan quqyq buzýshylyqtaryn tolyq moıyndap, ákimshilik quqyq buzýshylyq týraly hattamalarda kórsetilgen mán-jaılardy rastady.
Sot E.-ni ÁQBtK-niń 608-babynyń 6-bóligi jáne 611-babynyń 3-bóligi boıynsha kináli dep tanyp, 30 táýlikke ákimshilik qamaýǵa alý túrindegi jaza taǵaıyndady.
Sot qaýlysy zańdy kúshine engen joq.
Eske salsaq, buǵan deıin Almatyda mas kúıinde jasóspirimdi qaǵyp, oqıǵa ornynan qashyp ketken júrgizýshiniń 7 jylǵa sottalǵany týraly jazǵan edik.