Qonaevta qýatty qurylymdardyń mergenderi arasynda jarys ótti
QONAEV. KAZINFORM — Qonaev qalasynda Gas Gun Competition PRS (snaıpıng) dıstsıplınasy boıynsha Almaty oblysynyń Kýbogy ótti. Bul týraly Qorǵanys mınıstrligi málim etti.
Jarys ártúrli qashyqtyqta jáne túrli pozıtsııalardan atý jattyǵýlaryn qamtydy. Týrnırge Qazaqstan Respýblıkasynyń Ulttyq qaýipsizdik komıteti, Memlekettik kúzet qyzmeti, Qorǵanys mınıstrliginiń Arnaıy operatsııalar kúshteri, Ulttyq ulan bólimsheleriniń mergenderi, sondaı-aq quralaıdy kózge atqan áýesqoı mergender qatysty. Jarys tórt baǵyt boıynsha ótkizildi.
— Mergender dáldikti, atys daǵdylarynyń turaqtylyǵyn, shekteýli ýaqytta jumys isteý qabiletin, qashyqtyqty jyldam baǵalap, ártúrli jaǵdaıda oq atý baǵytyn túzetý sheberligin tekserýge baǵyttalǵan praktıkalyq jattyǵýlar keshenin oryndady. Synǵa túsken mergender joǵary tehnıkalyq daıyndyqty, zamanaýı joǵary dáldikti atý ádisterin meńgerýdi jáne barynsha jınaqylyqty kórsete bildi. Nátıjesinde «jartylaı avtomatty karabın» klasynda júldeli oryndardyń barlyǵyn Qorǵanys mınıstrliginiń Arnaıy operatsııalar kúshteriniń áskerı qyzmetshileri ıelendi, — delingen habarlamada.
Mergender saıysy áskerı qyzmetshiler men kúshtik qurylym qyzmetkerleriniń kásibı sheberligin jetildirýge, sondaı-aq kásibı jáne azamattyq atqyshtar qaýymdastyǵy arasyndaǵy ózara is-qımyldy nyǵaıtýǵa yqpal etti.
Buǵan deıin desanttyq-shabýyldaý áskerleriniń jaýyngerlik ázirligi tekserilip jatqanyn jazdyq.