Qonaevta kópqabatty úıdegi páterde gaz qospasy jarylyp, 2 adam zardap shekti
QONAEV. KAZINFORM – Almaty oblysynda kópqabatty turǵyn úıdegi páterde gaz-aýa qospasynyń jarylýy tirkeldi.
Tótenshe jaǵdaı týraly habar búgin «112» pýltine túsken. Oqıǵa Qonaev qalasyndaǵy tórt qabatty turǵyn úıdiń tórtinshi qabatyndaǵy páterde bolǵan.
Oqıǵa ornyna Almaty oblystyq tótenshe jaǵdaılar departamentiniń kúshteri men quraldary jedel túrde jiberildi. Jarylys saldarynan páterdiń ishki araqabyrǵalary, sondaı-aq esik pen tereze oıyqtary zaqymdanǵan. Eki adam jaraqat alyp, Qonaev qalalyq aýdandyq aýrýhanasyna jetkizildi.
– Turǵyndardy jylytý úshin oqıǵa ornyna vahtalyq kólik jiberilip, zardap shekkenderge psıhologııalyq kómek kórsetý maqsatynda psıholog maman tartylǵan. Aýmaqty polıtsııa qyzmetkerleri qorshaýǵa aldy, - delingen habarlamada.
Oqıǵa ornynda Almaty oblysy tótenshe jaǵdaılar departamentiniń 19 qyzmetkeri men 5 tehnıkasy jumys istedi.
Mamandardyń málimetinshe, turǵyn úı ortalyq gaz júıesine qosylǵan. Alaıda jarylys bolǵan páterde turmystyq gaz ballony qoldanylǵan.
Almaty oblystyq tótenshe jaǵdaılar departamenti eki qabattan joǵary kóppáterli úılerde turmystyq gaz ballondaryn saqtaýǵa jáne paıdalanýǵa tyıym salynatynyn eskertti.
Eske salaıyq, Qaraǵandydaǵy shaǵyn dámhanada gaz jarylyp, eki adam qaza tapqanyn habarlaǵan edik.