Qonaevta káriz qudyǵyna túsip ketken jylqy qutqaryldy

QONAEV. KAZINFORM - Qonaevtyń patrýldik polıtseıleri qıyn jaǵdaıǵa tap bolǵan jylqyny qutqaryp, naǵyz batyldyq pen kásibılik tanytty.

Almaty oblysy ortalyǵynyń jeke turǵyn úı sektorlarynyń birin patrýldeý kezinde «Búrkit-253» PPV polıtseıleri ashyq turǵan káriz qudyǵyna qulap qalǵan jylqyny baıqady.

Jaǵdaıdyń kúrdeliligin baǵalaı otyryp, polıtseıler jaqyn mańdaǵy patrýldik jasaqty kómekke shaqyrdy.

Qutqarý operatsııasy ońaı bolǵan joq: janýardyń salmaǵy men kólemi jumysty aıtarlyqtaı qıyndatty. Alaıda, Ernar Omarov pen Aıbek Tursynovtyń quramyndaǵy «Búrkit-253» PPV, sondaı-aq Darhan Esimhanov pen Serik Ordabaevtyń quramyndaǵy «Búrkit-261» patrýldik polıtsııa vzvod is-qımyldarynyń arqasynda jylqy aman-esen qudyqtan shyǵaryldy. Barlyq jumystar janýarǵa zııan keltirmeý úshin asa muqııat oryndaldy.

Qutqarý operatsııasy nátıjesi sátti aıaqtalyp, jylqy ıesine tabystaldy, óz kezeginde ol polıtseılerge alǵyrlyǵy jáne jedeldigi úshin rızashylyǵyn bildirdi.

– Biz tártipti saqtaý úshin ǵana emes, muqtaj jandarǵa da kómek kórsetý úshin qyzmet etemiz. Osyndaı sátterde bizdiń jumysymyz adamdardy qorǵaý ǵana emes, sonymen qatar ózin-ózi qorǵaı almaıtyndarǵa kómektesý ekenin túsinemiz, — dep bólisti Ernar Ýmarov

Bul oqıǵa polıtseılerdiń árqashan kúrdeli jaǵdaılarǵa daıyn ekenin jáne qıyndyqtardan qoryqpaıtynyn dáleldedi. Qutqarylǵan jylqy kúsh-qýattyń, batyldyq pen meıirimdiliktiń kez kelgen sátte kómekke kelýge daıyn ekendiginiń nyshanyna aınaldy.