Qonaevta eki kósheniń ataýy ózgeredi
QONAEV. KAZINFORM —Qonaev qalasyndaǵy Tsentralnaıa jáne Frýnze kósheleriniń ataýy ózgeredi. Mundaı sheshimdi depýtattar qalalyq máslıhattyń XXVII sessııasynda qabyldady.
Qala ákimdiginiń málimetinshe, Tsentralnaıa kóshesine — balalar jazýshysy Berdibek Soqpaqbaevtyń, Frýnze kóshesine Keńes Odaǵynyń batyry, Halyq qaharmany Saǵadat Nurmaǵambetovtyń esimi berilýi múmkin.
Bul másele oblystyq máslıhatta da qaralady.
Sonymen qatar sessııada Qonaev qalasy jáne aýyldyq okrýgteriniń 2023 jylǵy bıýdjetiniń atqarylýy týraly másele qaraldy.
Qalalyq ekonomıka jáne qarjy bóliminiń basshysy Láılá Keldibekovanyń sózinshe, bıýdjettiń kiris kólemi — 46 mlrd 774 mln teńge boldy.
— Ataýly áleýmettik kómekke 149,0 mln teńge bólinip, ıgerildi;
— № 10-shy shaǵyn aýdandaǵy úsh 60 páterli turǵyn úılerdiń qurylysyna barlyǵy 2 mlrd 198 mln teńge bólinip, onyń 2 mlrd 57 mln teńgesi ıgerildi;
— azamattardyń jekelegen sanattaryn turǵyn úımen qamtamasyz etýge, ıaǵnı apatty jaǵdaıdaǵy úılerdi joıý sharalary aıasynda 34 páter ıelerine 593,7 mln teńgege páter satyp alyndy;
— sýmen jabdyqtaý jáne káriz júıelerin damytý baǵdarlamalary boıynsha barlyǵy 11 mlrd 332 mln teńge ıgerilip jumystar júrgizildi;
— № 8-10 shaǵyn aýdandardyń kóshelerin kúrdeli jóndeý jumystaryna 785 mln teńge bólinip ıgerildi. Jolaýshylar tasymaldaý shyǵyndaryna 428,9 mln teńge baǵyttaldy.
