Qonaevta daýyl saldarynan 30 turǵyn úı men 40 km elektr jelige zaqym kelgen
QONAEV. KAZINFORM – Qonaevta kommýnaldyq jáne jedel qyzmetter qatty soqqan jeldiń saldaryn joıý úshin kúsheıtilgen rejımde jumys júrgizip jatyr.
Qonaev ákimdigi qalpyna keltirý sharalary tolyqtaı qala ákimdigi esebinen júrgiziletinin atap ótti. Qazir jedel shtab qurylyp, apat saldaryn joıýǵa 300-den astam adam men 60-tan asa arnaıy tehnıka jumyldyryldy.
Aldyn ala málimetterge sáıkes, shamamen 30 turǵyn úıdiń shatyryna zaqym kelgen. Sondaı-aq qatty jel saldarynan 40 shaqyrymǵa jýyq elektr jelisi zaqymdanǵan. Qazirgi tańda aqaýlar tolyqtaı qalpyna keltirildi.
- Tabıǵı qubylystyń saldarynan zardap shekkender joq, azamattardyń ómiri men densaýlyǵyna qaýip tirkelmedi. Jedel shtab qurylyp, barlyq qyzmetter jumys istep jatyr. Turǵyndardan túsken barlyq ótinimder baqylaýda, birde-bir mekenjaı nazardan tys qalmaıdy. Qala turǵyndaryn aýa raıy boljamdary men Qutqarý qyzmetiniń eskertýlerin qadaǵalaýǵa shaqyramyz, – dedi Qonaev qalasynyń ákimi Ashat Berdihanov.
Qutqarý qyzmeti aldaǵy kúnderi jeldiń ekpini sekýndyna 17–22 metrge deıin kúsheıýi múmkin ekenin eskertip, turǵyndardy qaýipsizdik sharalaryn qatań saqtaýǵa shaqyrdy.
Eske salaıyq, Qonaevta 8 aqpannan 9-yna qaraǵan túni 27 m/sek jyldamdyqpen jel soqqan. Onyń saldarynan ınjenerlik jelilerde aqaýlar bolyp, turǵyn úılerdiń shatyry ushqan jáne jeńil konstrýktsııalarǵa zaqym kelgen.
Sondaı-aq Alataý qalasynyń ár aýmaǵynda qatty jelden ınfraqurylym zaqymdanǵan.
