Qonaevta brakonerden zańsyz aýlanǵan balyq satyp alyp, Eýropaǵa eksporttaǵan kásipker jazalandy

ASTANA. KAZINFORM – Almaty oblysy Qonaev qalasynyń sotynda asa iri kólemdegi balyq ónimi «kókserke fılesi» kontrabandasy boıynsha is júrgizý aıaqtaldy. Bul týraly Bas kólik prokýratýrasy habarlady. 

Memlekettik aıyptaýshylar 2021 jyldyń qazany men 2022 jyldyń qyrkúıegi aralyǵynda kompanııa basshysy azamat I. brakonerden zańsyz aýlanǵan balyqty satyp alyp, Eýropalyq Odaqtyń ár túrli elderine eksporttaǵanyn dáleldedi.

«Eksportqa ruqsat alý úshin jasandy kókserke ósirýge múmkindigi joq sharýa qojalyǵynda balyqtyń shyǵý tegi týraly jalǵan qujattar paıdalandy. Zańsyz eksporttalǵan balyq ónimderiniń jalpy quny 210 mıllıonnan astam teńgeni qurady», - delingen habarlamada.

A.J. 26 shildesinde sot úkimimen azamat I. QK-niń 234-babynyń 2-bóliginiń 4-tarmaǵymen kináli dep tanylyp, 210 mln teńge kedendik tólemderdi memleket kirisine óndire otyryp, oǵan bir myń aılyq eseptik kórsetkish mólsherinde aıyppul jazasy taǵaıyndaldy.

Úkim zańdy kúshine engen joq.