Qonaevta bazardy jańǵyrtý talaptaryn buzǵan sýbektiler jaýapqa tartyldy
QONAEV. KAZINFORM – Qonaev qalasyndaǵy «Alǵa» saýda bazarynda jańǵyrtý jumystarynyń bastalmaýyna baılanysty jospardan tys tekserý júrgizilip, 7 saýda sýbektisinen zań buzýshylyqtar anyqtaldy.
QR Saýda jáne ıntegratsııa mınıstrliginiń málimetinshe, tekserý Qonaev qalasy ákimdiginiń resmı haty negizinde júrgizilgen. Nátıjesinde jergilikti Saýda jáne tutynýshylardyń quqyqtaryn qorǵaý departamenti zań talaptaryn buzǵan sýbektilerge anyqtalǵan kemshilikterdi 2026 jyldyń 31 jeltoqsanyna deıin joıý týraly nusqama berdi.
Ákimshilik sharalarmen kelispegen «Market Giant» JShS Qonaev qalasynyń ákimshilik quqyq buzýshylyq ister jónindegi mamandandyrylǵan sotyna shaǵymdanǵan.
– Bir aıǵa sozylǵan sot protsesiniń qorytyndysy boıynsha seriktestiktiń talap aryzy qanaǵattandyrýsyz qaldyrylyp, Departamenttiń qaýlysy óz kúshinde qaldy, – delingen mınıstrlik aqparatynda.
Sonymen qatar zańnamaǵa sáıkes kompanııanyń sot sheshimine apellıatsııalyq tártippen shaǵymdanýǵa quqyǵy bar.
Ulttyq statıstıka bıýrosynyń dereginshe, Almaty oblysynda 60 saýda bazary tirkelgen. Qazirgi ýaqytta olardyń toǵyzynda jańǵyrtý jumystary júrgizilip jatyr.
Jalpy respýblıka boıynsha 588 saýda bazary bar. Onyń 366-sy – ámbebap saýda bazary. Búginge deıin 189 bazar jańǵyrtýdan ótken, taǵy 67 nysandaǵy jumystardy 2026 jyldyń sońyna deıin aıaqtaý josparlanǵan. Qalǵan 110 saýda bazary qoldanystaǵy zańnama talaptaryna sáıkes keledi.
Saýda bazarlaryn jańǵyrtý birneshe jyldan beri kezeń-kezeńimen júrgizilip keledi. 2021 jylǵa deıin 84 bazar jańartylsa, 2021 jyly – 4, 2022 jyly – 33, 2023 jyly – 19, 2024 jyly – 16, al 2025 jyly 33 saýda bazary jańǵyrtylǵan.
QRPremer-Mınıstriniń orynbasary – Ulttyq ekonomıka mınıstri Serik Jumanǵarın bekitken Jol kartasy boıynsha 2025 jyly 100 saýda bazaryn jańǵyrtý josparlanǵan edi. Alaıda birqatar nysanda qurylys jáne uıymdastyrý jumystary aıaqtalmaǵandyqtan, jobalardy iske asyrý merzimi qaıta qaralyp, olardy 2026 jyldyń sońyna deıin aıaqtaý belgilendi.
Osyǵan baılanysty óńirlerde jańartylǵan Jol kartalary bekitilip, jergilikti atqarýshy jáne beıindi memlekettik organdar tarapynan jobalardyń oryndalýyna baqylaý kúsheıtildi.
Qazirgi ýaqytta 33 saýda bazarynda jańǵyrtý jumystary tolyq aıaqtalǵan, taǵy 58 nysanda jumystar belsendi júrgizilip jatyr. Barlyq josparlanǵan jumysty 2026 jyldyń sońyna deıin aıaqtaý kózdelgen.
Saýda bazarlaryn jańǵyrtý aıasynda ınfraqurylymdy jańartý, zamanaýı saýda standarttaryn engizý, sanıtarııalyq jáne órt qaýipsizdigi talaptaryn kúsheıtý, qolma-qol aqshasyz tólemderdi keńeıtý, kásipkerler men tutynýshylarǵa qaýipsiz ári qolaıly jaǵdaı jasaý kózdelip otyr.
Aıta keteıik, Almatyda «Baısat» bazary aýktsıonda 24 mlrd teńgege satyldy.
