Qonaevta bala óliminen keıin jekemenshik elektr jelilerine ne bolady – ákim jaýaby

QONAEV. KAZINFORM – Qonaev qalasynyń ákimi Ashat Berdihanov Qapshaǵaı sý jaǵalaýynda bolǵan qaıǵyly jaǵdaıǵa baılanysty pikir bildirdi.

Maýsym aıynyń basynda Qonaevtaǵy demalys aımaǵynda tok soqqan 11 jasar bala kóz jumdy.

Qonaev ákiminiń aıtýynsha, qaıǵyly oqıǵa 1970-shy jyldardan beri jumys istep kele jatqan jekemenshik jaǵajaıda bolǵan. Al elektr berý jelisi qaýipsizdik talaptaryna saı bolmaǵan.

— Atalǵan jeliler jekemenshikke tıesili bolǵan. Oqıǵadan keıin tekseris júrgizilip, qylmystyq is qozǵaldy. Tergeý nátıjeleri qosymsha habarlanady. Eki kún ishinde jeli basqa jerge kóshirildi. Ádette, elektr berý jelisin kóshirý úshin túrli kelisimder qajet, bul ýaqyt alady. Alaıda bul joly barlyq qyzmet jedel áreket etti. Osydan keıin biz oblys kóleminde, naqty aıtqanda bul salada jumys isteıtin barlyq kásipkerge tekseris júrgizdik. Qazir olardyń sany 140-tan asady. Barlyǵyn akt zalyna jınap, Tótenshe jaǵdaılar departamenti, prokýratýra jáne aýdandyq elektr júıesi ókilderimen birge olardyń mindetterin túsindirdik. Qazirgi tańda qala aýmaǵynda qaýipsizdik talaptaryna saı kelmeıtin, tómen túsip turǵan jeliler anyqtalǵan joq, — dedi Ashat Berdihanov.

Ákim sondaı-aq elektr berý jelileri «jekemenshikte bola ala ma» degen suraqqa jaýap berdi. Onyń aıtýynsha, bul jobalyq sheshimge baılanysty. Eger menshik ıesi kelisse, jeli jekemenshik retinde qala beredi. Biraq olardyń qaýipsizdigi men kútimine tolyq jaýapkershilik sol menshik ıesinde bolady.

— Bul jeliler qalalyq qurylymǵa da, «Alataý jaryq kompanııasyna» da tıesili bolmaǵan. Jaýapkershilik te, kiná da menshik ıesinde. Tergeý qorytyndysyn kúteıik, — dedi ákim.

Sonymen qatar Ashan Berdihanovtyń aıtýynsha, elektr jeli ıesiz dep tanylsa nemese bir jyl ishinde ıesi tabylmasa, sot arqyly aýdandyq elektr júıesiniń menshigine berilýi múmkin.

— Jekemenshik elektr jelileriniń ıesi ony qalalyq menshikke ótkizýge nıet bildirse, barlyq salyqtaryn tóleýi kerek. Tek sodan keıin aýdandyq elektr júıesi ony qabyldaı alady. Qazir qalada ıesiz jeliler joq deýge bolady, biz menshik ıelerimen jaqsy baılanys ornattyq, — dedi ákim.

Eske salaıyq, buǵan deıin Qapshaǵaıda 11 jasar bala óliminen keıin qalanyń elektr jelilerine tekserý júrgiziletinin jazǵanbyz.