Qonaevta Almaty oblysynyń HІІ Azamattyq forýmy ótti
QONAEV. KAZINFORM — Qonaev qalasynda «Jergilikti ÚEU-dyń memlekettik basqarý isine qatysýy» taqyrybynda Almaty oblysynyń Azamattyq forýmy ótti. Bul týraly QR Mádenıet jáne aqparat mınıstrliginiń baspasóz qyzmeti habarlady.
Forým azamattyq qoǵam men memlekettik organdar arasyndaǵy seriktestikti nyǵaıtyp, ashyq dıalog dástúrin jalǵastyrady.
Forýmnyń negizgi taqyryby — úkimettik emes uıymdardyń jergilikti basqarý protsesterine belsendi qatysýy, sheshim qabyldaý barysyndaǵy róldi arttyrý, qoǵamdyq baqylaýdy damytý jáne keri baılanys tetikterin jetildirý.
— Paneldik sessııalar aıasynda azamattyq qatysýdyń jańa formalary, aýyldyq óńirlerdegi áleýmettik bastamalar, jastar men áıelderdiń basqarý isine aralasýy, sondaı-aq ashyq úkimet qaǵıdattaryn ilgeriletý máseleleri qarastyryldy, — dep jazdy mınıstrliktiń baspasóz qyzmeti.
Forýmnyń basty ereksheligi — pikirtalas alańdarynyń zamanaýı formatta uıymdastyrylýy. Qatysýshylar tájirıbe almasyp, jańa seriktestik ornatty.
— Plenarlyq otyrysta azamattyq qoǵam ınfraqurylymyn damytý, memlekettik áleýmettik tapsyrys pen granttyq qarjylandyrý júıesin jetildirý, volonterlik pen qaıyrymdylyqty nasıhattaý baǵyttary talqylandy, — delingen aqparatta.
Forým sońynda óńirdiń áleýmettik damýyna úles qosqan azamattyq qoǵam ókilderi arnaıy alǵys hattarmen marapattaldy.
Eske salsaq, tamyzda Almatyda ata-anasynyń qamqorlyǵynsyz qalǵan jáne jetim balalarǵa arnalǵan tálimgerlik taqyrybyndaǵy alǵashqy respýblıkalyq forým ótken bolatyn.