Qonaevta adamdar kóbine qandaı qylmysqa barady
QONAEV. KAZINFORM – Qonaevta adamdar kóbine qoǵamdyq tártipti buzý, oıyn-saýyq pen tamaqtaný oryndarynda alkogoldi ishý sekildi quqyqbuzýshylyqtar jasaıdy. Bul týraly Qonaev qalasy prokýrorynyń orynbasary Merǵalym Smaǵulov aıtty.
«Saýda oryndarynda tyıym salynǵan túngi ýaqytta jáne kámeletke tolmaǵan adamdardyń alkogoldi satyp alý faktileri de bar, bul quqyq buzýshylyqtarǵa jaǵdaı jasaıdy. Mas kúıinde adam aqyl-oıy men sanaly minez-qulyq qabiletin joǵaltady. Ókinishke qaraı, ótken jyly qala aýmaǵynda qasaqana kisi óltirý boıynsha úsh qaıǵyly oqıǵa tirkeldi. Taldaý kórsetkendeı, barlyq qylmys túnde, janjal kezinde jáne alkogoldi tutyný kezinde bolǵan», - dedi Merǵalym Smaǵulov.
Atalǵan qaıǵyly jaǵdaılardyń aldyn alý úshin qala prokýratýrasy men jergilikti polıtsııa qyzmeti birlesip, túngi ýaqytta jáne kámeletke tolmaǵandarǵa alkogol satýdyń jolyn kesý boıynsha júıeli profılaktıkalyq is-sharalar men túsindirý naýqanyn ótkizip jatyr.
«Sondaı-aq, Qonaev qalasynyń prokýratýrasy qalanyń oıyn-saýyq oryndarynda qoǵamdyq tártipti buzýdyń aldyn alý, sondaı-aq, qoǵamdyq tamaqtaný men saýda oryndarynda alkogol ónimderin ótkizý tártibin saqtaý úshin kásipkerlik sýbektilerimen júıeli túrde túsindirý jumystaryn júrgizedi. Osyǵan baılanysty, prokýratýra barlyq azamatty zańdy saqtaýǵa jáne qalamyzdaǵy qaýipsizdik pen tártipti saqtaýǵa járdemdesýge shaqyrady», - qala prokýrorynyń orynbasary Merǵalym Smaǵulov.
