Qonaevta 866 bala qyzylshaǵa qarsy ekpe aldy
Qazirgi tańda Qonaevta balalardy qosymsha ımmýndaý júrip jatyr. Bul rette 6 aıdan 11 aıǵa deıingi, 2-5 jas aralyǵyndaǵy balalar ımmýndaýǵa jatady. Odan bólek, qyzylshaǵa josparly egý (1-6 jas aralyǵy) júrgizilýde. Bul týraly Qonaev qalalyq aýrýhanasynyń epıdemıolog-dárigeri Erlan Sarjanov aıtty, dep habarlaıdy Kazinform.
«Ótken aptanyń jeksenbisinde 1500 dana ekpe ákelindi. Qazirgi ýaqytta Qonaevta 866 bala qyzylshaǵa qarsy ekpe aldy.
Sondaı-aq medıtsınalyq qyzmetkerler de qyzylshaǵa qarsy vaktsına alyp jatyr. Qaladaǵy epıdemııalyq jaǵdaı turaqtalǵansha qosymsha ımmýndaý protsesin toqtatpaımyz. Shaharǵa qarasty Sheńgeldi jáne Zarechnyı aýyldyq okrýgterindegi turǵyndary da vaktsına ala alady. Ol úshin medıtsınalyq qyzmetkerlerge júginýleri tıis», – dedi epıdemıolog.
Aýrýhananyń juqpaly aýrýlar bólimine dene qyzýy, jótel men álsizdikke shaǵymdanyp, kúnine 20-25 naýqas keledi. Bul týraly bólimniń jalpy tájirıbe dárigeri Nurǵazy Shamuratov aıtty.
«Qyzylsha juqtyrǵandardyń kóbi 1 jasqa deıingi balalar. Aýrýy asqynǵandardy birden statsıonarlyq emdeýge jatqyzyp jatyrmyz. Keıbir naýqastar úı jaǵdaıynda emdelýde. Olardyń jaǵdaıyn baqylaýda ustap otyrmyz. Buǵan deıin aýrýhanadan emdelip shyqqandardyń sany – 100-den astam adam boldy», – dedi dáriger.
Ol qyzylshanyń alǵashqy 3-5 kúni joǵary respıratorly vırýsty ınfektsııa túrinde júretinin aıtty. Osy kezeńnen keıin denede bórtpeler paıda bolady.
Eske salsaq, elimizde 6 qarashadan bastap qyzylshaǵa qarsy qosymsha jappaı ımmýndaý bastaldy. 23 qarashada Qazaqstanǵa qosymsha jappaı ımmýndaý júrgizý úshin 500 myń doza mólsherinde qyzylshaǵa, qyzamyqqa jáne parotıtke qarsy vaktsına (QQP) partııasy keldi. Birinshi kezekte 6 aıdan 11 aıǵa deıingi balalar ımmýndaýǵa jatady. Jeltoqsannan bastap egý mártebesine qaramastan 2 jastan 5 jasqa deıingi balalardy, medıtsına qyzmetkerlerin (55 jasqa deıin), sondaı-aq profılaktıkalyq egýdi ótkizip alǵan 18 jasqa deıingi adamdardy qyzylshaǵa qarsy qosymsha ımmýndaý josparlanǵan.
