Qonaevta 14 jasar qyzdy zorlady degen kúdikpen eki eks-polıtseı ustaldy

Qonaev qalasynda burynǵy eki polıtsııa qyzmetkeri kámeletke tolmaǵan qyzdy zorlady degen kúdikke ilindi, dep habarlaıdy Kazinform.

«Anonımdi derekkózdiń málimetinshe, Qonaev qalasynda eki polıtsııa qyzmetkeri qyzmettik jaǵdaıyn paıdalanyp, 14 jasar oqýshy qyzben jynystyq qatynasqa túsip, ony vıdeoǵa túsirgen (vıdeony qazir qyzmetkerlerdiń ózderi taratyp jatyr). Bizge belgilisi, onyń biri kámeletke tolmaǵandar jónindegi ınspektor, ekinshisi — ǵımaratty kúzetetin polıtsııa qyzmetkeri, qazir ekeýi de qamaýǵa alynyp, jumystan bosatylǵan», — dep jazylǵan qordyń Instagram paraqshasynda. 

Almaty oblysynyń polıtsııa departamenti eki kúdiktiniń qamaýǵa alynǵanyn habarlady.

«7 qarashada Almaty oblysynyń 43 jastaǵy turǵyny eki adamnyń kámeletke tolmaǵan qyzyna qatysty seksýaldy sıpatta zorlyq-zombylyq jasaǵanyn aıtyp, polıtsııaǵa júgindi. Sol kúni QR QK 120-baby, 3-1-bóligi, 1-tarmaǵy boıynsha eki qylmystyq is tirkeldi. Jedel-izdestirý sharalary barysynda polıtsııa qyzmetkerleri jeke basyn anyqtap, 23 jáne 22 jastaǵy eki kúdiktini ustady. Tergeý nátıjesi boıynsha olar qamaýǵa alyndy», — dep habarlady Almaty oblysy polıtsııa departamentiniń baspasóz qyzmeti.

Sondaı-aq polıtsııanyń málimetinshe, qylmys jasaǵanǵa deıin polıtseıler jumystaǵy kemshilikteri úshin óz erkimen jumystan bosatý jóninde ótinish jazǵan.

Alaıda ol kezde jumystan bosatý týraly buıryq shyqpaǵan bolatyn. Sol sebepti qylmys jasaǵan kezde olar polıtsııa qyzmetkerleri bolyp sanalady.

«Qazirgi ýaqytta olar jumystan shyǵarylyp, ýaqytsha ustaý ızolıatoryna qamaýǵa alyndy», — dep habarlady polıtsııa.

Jaqyn ýaqytta sotqa deıingi tergeý aıaqtalyp, qylmystyq is materıaldary sotqa joldanady. 

QR QІJK 201-babynyń talaptaryna sáıkes ózge aqparat jarııalanbaıdy.

Eske salsaq, buǵan deıin qyz zorlady degen kúdikpen Taldyqorǵan qalalyq polıtsııa basqarmasynyń basshysy qamaýǵa alynǵan bolatyn.