Qonaevta 102 jastaǵy soǵys ardagerine qurmet kórsetildi
«Árbir qazaqstandyq ardagerdiń uly erligin qurmettep, este saqtaýy tıis. Bizge beıbit aspan syılaǵan adamdardyń esimderin eshqashan umytpaýymyz kerek. Qart adamdarǵa qamqorlyq jasaý – ortaq paryzymyz. Olardy qoldaý árqashan polıtsııa men quqyq qorǵaý áskerleri áskerı qyzmetshileriniń nazarynda bolady. Búginde bizdiń azamattarymyz qyzmetterin alańsyz oryndap, jetken jetistikteri úshin shyn qýana alady, bolashaqqa jospar qura alady. Munyń bári, Jeńis batyrlary, sizderdiń eńbekterińizdiń arqasynda», - dedi ardagerge Aqparattyq-nasıhattaý tobynyń jetekshisi, Ulttyq ulan Bas qolbasshysynyń tárbıe jáne áleýmettik-quqyqtyq jumystar jónindegi orynbasary, Halyq qaharmany, polkovnık Qaırat Úmbetov.
Ardagerge Іshki ister mınıstrligi men Ulttyq ulan Bas qolbasshysynyń alǵys hattary, sondaı-aq baǵaly syılyqtar tabystaldy.
Oksana Betebaeva 1920 jyly 7 qazanda dúnıege kelgen. Ýkraına KSR Poltava oblysynyń týmasy, jeti jyldyq mektepten keıin medıtsınalyq ýchılışege túsip, ony bitirgennen keıin Petrovo-Romensk aýdandyq aýrýhanasynda medbıke bolyp jumys istedi. 1941 jyly shildede 20 jasynda Oksana Demıdovna áskerge shaqyrylyp, Poltava qalasynyń №1668 áskerı gospıtalinde qyzmet etti. ІІ dárejeli Otan soǵysy ordeni, Jýkov medali jáne basqa da mereıtoılyq medaldarmen marapattalǵan.
Soǵys jyldarynda ol jaraqat alǵan ofıtser Bekejan Betebaevpen kezdesti. Keıin oǵan úılendi. Fashıstik Germanııany jeńgennen keıin jas jup Qazaqstanǵa keldi. Ofıtser áıelimen birge Jarkent qalasyna qyzmet etýge jiberildi, onda Oksana Demıdovna mamandyǵy boıynsha jumysyn jalǵastyrdy. Keıin otbasy qazirgi Qonaev qalasyna kóshti. Oksana Demıdovna Qonaevta týystarymen birge turady, ol – qala turǵyndarynyń tiri ańyzy men maqtanyshy.
