Shomylý maýsymy: Qonaevqa kelýshiler byltyrǵydan 300 myńǵa artqan
QONAEV.KAZINFORM - Bıyl Qapshaǵaı sý qoımasynyń jaǵalaýyna demalýǵa 1,5 mıllıon adam kelgen. Ótken jylmen salystyrǵanda demalýshylar sany 300 myńǵa kóbeıdi. Bul týraly Qonaev ákimdiginiń baspasóz qyzmeti habarlady.
Qala ákimdiginiń málimetine sáıkes, shahardaǵy 140 demalys orny 840 mln. teńgege qyzmet kórsetken.
- Bıyl «Aq Jaıyq» demalys ornynyń qonaq úı kesheni qoldanysqa berildi. Aldaǵy ýaqytta ınvestıtsııalyq qarjyǵa 9 demalys nysany salynbaq. Tartylatyn qarajattyń jalpy kólemi –294,6 mlrd. teńge. Jańadan 2000-nan astam jumys orny qurylady, - dep habarlady Qonaev ákimdiginen.
Sondaı-aq, qala basshylyǵy shomylý maýsymy kezinde ashyq sýda júzýden «Ocean Man» Halyqaralyq jarysy, «Rock family fast» festıvali, «Aspan fest» kontserti uıymdastyrylǵanyn málimdedi.
Eske salaıyq, buǵan deıin Qonaev qalasyndaǵy eski garajdar buzylyp, ornyna basqa nysandar salynatynyn jazǵanbyz.
