Qonaevqa kóshirilgen balalar úıiniń ǵımaraty Almatyǵa beriledi
ALMATY. KAZINFORM – Almaty oblysynyń ákimi Marat Sultanǵazıev Almaty qalasyndaǵy balalar úıiniń tóńiregindegi jaǵdaıǵa qatysty pikir bildirdi.
Almaty oblysynyń №1 balalar úıi apatty jaǵdaıyna baılanysty Almatydan Qonaevqa kóshirilgen edi.
– Balalar úıi Almaty qalasynda ornalasqan jáne biz ony qalanyń qaramaǵyna berýdi josparlap otyrmyz. Jalpy aýmaǵy shamamen eki gektar. Almaty qalasy ákimdigine berilgennen keıin bul jerge qatysty jobalaý jumystary bas jospar men ekologııalyq talaptarǵa sáıkes júrgiziletin bolady, - dedi oblys basshysy.
Marat Sultanǵazıevtiń aıtýynsha, ol bul balalar úıine birneshe ret barǵan jáne onyń jaǵdaıy nashar ekenin kórgen.
– Oblystyq bilim basqarmasy men ustazdar Qonaevta, al balalar sol jaqta turady. Dırektor men tárbıeshiler bar, biraq jalpy alǵanda balalar óz betimen qalǵan – demalys kúnderi saýda ortalyqtaryna barady, qalaǵanynsha ýaqyt ótkizedi. Alaıda nátıjege qarasaq, joǵary oqý oryndaryna túsetinderdiń sany óte az. Men olardan kim bolǵylary keletinin suradym. Biri – basketbol jattyqtyrýshysy bolǵysy keledi, biraq ol esh jerde kásibı daıyndyqtan ótpegen, tek balalar úıiniń alańynda oınaıdy. Ekinshisi – áskerı maman bolǵysy keledi. Men oǵan Qonaevtyń mańynda áskerı bólimder bar ekenin, demalys kúnderi sol jerlerge baryp daıyndalýǵa bolatynyn túsindirdim, - dedi ákim.
Onyń aıtýynsha, tárbıelenýshilerdiń kóbi — oblys turǵyndary, tek Almatyda ómir súrýge úırenip qalǵan. Qonaev qalasynda olarǵa sapaly bilim alýǵa jáne bolashaq mamandyǵyn ıgerýge tolyq jaǵdaı jasalmaq.
– Qazir oblysta qurylys qarqyndy júrip jatyr, jylyjaı keshenderi men óndiris oryndary damyp keledi. Bul balalar sol jerde tájirıbeden ótip, jumys isteı alady. Biz olardy tek kóshirýdi emes, kásibı bilim alyp, bolashaqqa senimmen qaraıtyndaı etýdi kózdeımiz. Olardyń taǵdyryna oblystyq bilim basqarmasy men pedagogtar jaýapty. Eger biz osy balalardyń bolashaǵy bolǵanyn qalasaq, olarǵa qajetti jaǵdaı jasaýymyz kerek, - dedi Marat Sultanǵazıev.
Qonaev qalasyndaǵy jańa balalar úıi zamanaýı standarttarǵa saı jabdyqtalǵan: demalys aımaqtary, aspazdyqty úıretetin as úı, shashtaraz, sport zaly bar. Tárbıelenýshiler bul ǵımarattan shyqpaı-aq birneshe mamandyqty qatar meńgere alady. Ákimniń aıtýynsha, Qonaevta mundaı mekeme buryn-sońdy bolmaǵan.
Al eski ǵımaratqa 2016 jyly ázirlengen jobalyq-smetalyq qujattama boıynsha jóndeý quny 1,6 mlrd teńge dep baǵalanǵan. Qazir bul soma eki esege artqan, alaıda sońǵy saraptama ǵımarattyń kúrdeli jóndeýge de jaramsyz ekenin kórsetken.
– Ol jaqtaǵy topyraqtyń qandaı ekeni bárimizge belgili. Eger jer silkinisi bola qalsa, saldary óte aýyr bolýy múmkin. Biz balalardyń ómirin qaýipke tige almaımyz, - dedi óńir basshysy.
Qazirgi ýaqytta balalar úıinde 100-den astam tárbıelenýshi turady.
Eske salaıyq, bıyl naýryz aıynda Almaty oblysynyń №1 balalar úıiniń tárbıelenýshileri ǵımarattyń Almatydan Qonaevqa kóshiriletinine narazy boldy.
Keıin №1 balalar úıiniń tárbıelenýshileri Almatyda qalatyn boldy.
Alaıda Almaty oblysy ákiminiń 2025 jylǵy 9 shildedegi qaýlysy jáne bilim basqarmasynyń 10 shildedegi buıryǵy negizinde tárbıelenýshilerdi kezeń-kezeńimen Konaev qalasyndaǵy jańa zamanaýı balalar úıine kóshirý jumystary bastaldy.