Qonaev turǵyndary jaryqqa baılanysty joldy jaýyp tastady: ákimdik túsinik berdi
Qala turǵyndarynyń joldy jaýyp tastaǵan vıdeo keshki ýaqytta áleýmettik jelide paıda boldy. Óńir ákimdigi turǵyndarmen kezdesýge Qonaev ákiminiń orynbasary Marlan Joldahmet barǵanyn málimdedi.
«Kooperatıv basshylyǵy senimsiz turǵyndarǵa silteme jasaı otyryp, qyzmet kórsetýshige – «AlmatyEnergoSbyt» JShS-na 32 mln teńgeden astam qaryz boldy. Bul soma aı saıyn ósip jatyr. Jasalǵan tólemder kestesi ýaqytyly jáne tolyq emes oryndalǵandyqtan, osy jyldyń 24 shildesinde saıajaı kooperatıvi elektr qýatynan ajyratyldy. Qaryz saldarynan elektr energııasyn ajyratqannan keıin qala ákimi N.Qumataevtyń sheshimimen turǵyndarmen jáne saıajaı kooperatıviniń basshylyǵymen kezdesý úshin qala ákiminiń orynbasary M.Joldahmet jiberildi. Ol sol jerde jaǵdaıdy eskere otyryp, tólem kestesi jasalǵanyn, oǵan sáıkes tólem jasalýy kerek ekenin túsindirdi. Sonymen qatar kooperatıv qyzmetkerleri men baqylaýshylarǵa senimsiz tutynýshylarmen jumys isteýge kómektesetin turǵyndar qatarynan bastamashyl top qurý usynyldy. Qajet bolǵan jaǵdaıda ýchaskelik ınspektor tartylatyn bolady», - dep habarlady Almaty oblysy ákimdiginiń baspasóz qyzmetinen.
Turǵyndar qoldanystaǵy zańnamaǵa sáıkes kooperatıvterdiń qyzmetine aralasýǵa quqyǵy joq bolǵandyqtan, qalalyq ákimshilikten kómek surap jatyr. Alaıda jergilikti halyqty elektr energııasymen qamtamasyz etý máselesin sheshý úshin Qonaev qalalyq turǵyn úı-kommýnaldyq sharýashylyq, jolaýshylar kóligi, avtomobıl joldary jáne turǵyn úı ınspektsııasy bólimi saıajaı kooperatıvinde jańa elektr jelisiniń qurylysy aıaqtalýǵa jaqyn: júktemeni bólý úshin 11 transformatorlyq qosalqy stantsııa ornatyldy.
«Aldaǵy ýaqytta nysandar «Alataý Jaryq kompanııasy» balansyna beriletin bolady. Turǵyndardyń árqaısysymen derbes shart jasalady, al tólem biryńǵaı bekitilgen tarıf boıynsha júrgiziletin bolady. Qazir elektr energııasyn berý ýaqytsha qalpyna keltirildi. Kooperatıv basshylyǵy energııa berýshi kompanııa aldyndaǵy bereshekti óteý jóninde shara qabyldap jatyr», - dep atap ótti ákimdik ókilderi.
