Qonaev pen eki aýdannyń bir bóligi Alataý qalasy quramyna enýi múmkin

QONAEV. KAZINFORM – Almaty oblysynyń ákimdigi Qonaev, Іle jáne Talǵar aýdandaryna tıesili jerlerdiń bir bóligin jańa Alataý qalasyna berýdi josparlap otyr.

Almaty oblysy ákimdigi men óńir máslıhatynyń «Alataý qalasynyń shekarasyn (shegin) belgileý týraly» birlesken sheshimi «Ashyq NQA» portalynda jarııalandy. 

«Almaty oblystyq máslıhaty sheshiminiń jáne Almaty oblysynyń ákimdigi qaýlysynyń qosymshasyna sáıkes Alataý qalasynyń shekarasy (shegi), onyń shegine jalpy aýdany 88267,0086 gektar Qonaev qalasynyń, Іle jáne Talǵar aýdandarynyń keıbir jerlerin qosa otyryp, belgilensin», – delingen qujatta.

Atap aıtqanda, Alataý qalasynyń quramyna Qonaev qalasynan 10937,0052 gektar, Іle aýdanynan 65213,0004 gektar jáne Talǵar aýdanynan 12117,003 gektar jer telimi ótedi.

Osy jyldyń basynda Almatydan soltústikke qaraı 47 shaqyrym jerde ornalasqan Jetigen aýyly oblystyq mańyzy bar Alataý qalasyna aınalǵan bolatyn. 

Buǵan deıin jańadan qurylǵan Alataý qalasynyń damý baǵyty týraly jazǵan edik. 

Keıin Alataý qalasynyń ákimi qyzmetine Arken Ótenov taǵaıyndaldy.