Qonaev mýzeıinde erekshe merekelik shara uıymdastyryldy

Bul joly mýzeı qyzmetkerleri Dinmuhamed Qonaev ómir súrgen keńes zamanyndaǵy adamdardyń bos ýaqyttaǵy demalysyn ınstallıatsııalyq ádispen sýretteýge tyrysty. ıAǵnı, mýzeı aýlasyna arnaıy bı alańy jasalyp, ol jerge keńes zamanyna tán telefon-avtomat, baǵdarsham, afısha jáne basqa da keńes zamanyna tán buıymdar qoıyldy. Sol kezdegi tanymal ánder shyrqalyp, sol kezdegi bı áýenderi oryndaldy.

«QazAqparat» tilshisine bergen suhbatynda Dımash Ahmetuly Qonaevtyń nemere qaryndasy Jannet Serikbaeva bul sharaǵa daıyndyq birneshe aptaǵa sozylǵandyǵyn aıtty.

«Dımash aǵanyń ómiri keńes zamanyna tuspa-tus keldi ǵoı. Mine biz sol kezeńdi, sol kezeńniń ahýalyn berýge tyrystyq. Tipti «Qazaqfılm» kınostýdııasynyń kómegimen ózimiz de búgingi shara barysynda keńes zamanyna tán kıimderdi kıip júrýdi uıǵardyq», - dedi J. Serikbaeva.

Sonymen qatar, Jannet apa Dımash Ahmetuly jaıynda estelikterimen bólisti.

«Dımash aǵa týraly saǵattap áńgimeleýge bolady. Ol bir erekshe meıirimdi jan bolatyn. Ol kisiniń ádeptiligi, sóıleý máneri ǵajap edi. Óziniń týystaryna erekshe qamqorlyqpen qaraıtyn. Ásirese, balalardy erekshe jaqsy kóretin, erkeletetin. Jaz bolsa, Býtakovka shatqalynda bir kishigirim saıajaıdy óz aqshasyna jalǵa alyp, jaz aılarynda sonda baryp turatyn. Dımash aǵanyń bir inisi (Asqar Qonaev) jáne jeti qaryndasy boldy ǵoı. Men besinshi qaryndasy - Naılıa Ahmetqyzynyń qyzymyn. Sonda búkil nemere inileri men nemere qaryndastaryn qasyna jınap alýshy edi. Biz jaz boıy sol saıajaıda ómir súretinbiz. Saıajaıǵa kezinde sol kezdegi memleket qaıratkerleri Alekseı Kosygınniń, Leonıd Brejnevtiń kelgenin bilemin. Tipti, Leonıd Ilıchtiń meni tizesine otyrǵyzyp, bir qorap konfet syılaǵyny áli esimde», - dedi J. Serikbaeva.