Qonaev-Kúrti joly Almaty arqyly ótetin kólik aǵynyn azaıta ma
QONAEV. KAZINFORM — QazAvtoJol ulttyq kompanııasy Almaty-Qonaev-Kúrti avtojolynyń qazirgi jaı-kúıin tanystyrdy.
QazAvtoJol Almaty oblystyq fılıalynyń bólim basshysy Janat Ótepbergenovtyń aıtýynsha, respýblıkalyq mańyzy bar Kúrti-Qonaev avtojolynyń uzyndyǵy — 67 shaqyrym.
Bul joldy qaıta qurylymdaý, ıaǵnı 2 jolaqty joldy 4 jolaqqa deıin keńeıtý jumystary 2020 jyly bastalǵan. Merdiger uıym — «Atyraýınjstroı-AIS» JShS.
— Qazirgi ýaqytta 30 shaqyrymdaı asfalt-beton jamylǵysyn tóseý jumystary qalyp otyr. Jyl sońyna deıin jumysty aıaqtaımyz degen jospar bar, — dedi ol.
Janat Ótepbergenov merdiger uıym jobany ýaqtyly aıaqtaý úshin 150 tehnıka, 300 jumysshy jumyldyrǵanyn jáne 3 asfaltbeton zaýyty jumys istep turǵanyn atap ótti.
— Qonaev-Kúrti joly — Almaty-Astana, Almaty-Óskemen tasjoldaryn jalǵap turǵan kúre jol. Sondyqtan bul joldyń tolyq ashylýy tranzıttik áleýetti arttyrýǵa múmkindik beredi. Qazir júrgizýshiler, Qytaıdan keletin júk kólikteri negizinen Úlken Almaty avtomobıl aınalma jolymen júrip jatyr. Biraq qurylys jumystary aıatalǵan soń, Qonaev-Kúrti joly Qorǵas jáne basqa da ótkizý pýnkterinen keletin taýalardy Almatyǵa kirmeı Ortalyqqa Qazaqstanǵa jetkizýge múmkindik beredi, — dedi QazAvtoJol ókili.
Almaty-Qonaev jolynyń jaǵdaıy qalaı?
Kúrti-Qonaev joly ári qaraı Qonaev-Almaty jolymen jalǵanady. Al 1–sanattaǵy 6 jolaqty bul avtojolda qazirgi ýaqytta kólik aǵyny kóbeıgen. Sebebi kólik arqyly Qapshaǵaı ne Alakólge demalýǵa baratyn azamattar dál osy ýchaskemen ótedi.
QazAvtoJol Almaty oblystyq fılıalynyń ınjener-sáýletshisi Dáýren Zakırovtyń aıtýynsha, 42 shaqyrym bolatyn Almaty-Qonaev jolymen jumys kúnderi 30 myńǵa jýyq, al demalys kúnderi 50 myń kólik júredi.
Bul statıstıka aqyly jol termınalynda ótetin temir tulparlar esebi boıynsha alynǵan.
— Termınalda 6 jolaq aldyn ala tólem jasaǵandar úshin jáne 6 jolaq qolma-qol tólemge arnalǵan. Odan bólek munda operatorlar jumys isteıdi, olar júrgizýshilerge júrgen joldary boıynsha qalaı tólem jasaý kerek ekenin túsindiredi, — dedi ol.
Al Janat Ótepbergenov Almaty-Qonaev (respýblıkalyq Almaty-Óskemen jolynyń bóligi) syndy kólik aǵyny joǵary joldarda servıstik qyzmetterdiń qoljetimdiligine erekshe nazar aýdarylatynyn aıtty.
Onyń sózinshe, munda janar-jaǵarmaı quıý beketterin salar kezde jolaýshylarǵa qajetti barlyq qyzmetterdi qamtamasyz etý týraly mindet qoıylady.
— Janar-jaǵarmaı beketteri salynatyn kezde biz tehnıkalyq shart beremiz. Júrgizýshiler men jolaýshylarǵa yńǵaıly bolýy úshin dúken, namazhana, ishtegi dárethana bolýyn talap etemiz. Bıznes ıeleri soǵan sáıkes nysandaryn salady. Sondaı-aq adamdardyń suranysyna qaraı keı beketterde elektrli kólikterdi qýattaıtyn qurylǵylar ornatyla bastady, — dedi fılıaldyń bólim basshysy.
Joldardy kútip ustaý
Jalpy QazAvtoJol málimetine sáıkes, Almaty oblysynda respýblıkalyq mańyzy bar avtomobıl joldarynyń uzyndyǵy — 1734 shaqyrym.
Onyń 681 shaqyrymy — birinshi sanatty, 328 shaqyrymy — tsementbetondy jabynmen jabylǵan jáne onyń bári — aqyly joldar.
Bas-aıaǵy 134 kópir men jol ótkeli, 2200 sý ótkizgish qubyr bar.
— Bul joldardy kútip ustaýmen «KAJservıs» mekemesiniń 7 jol paıdalaný bólimi aınalysady. Quramynda 368 jumysker, 172 arnaıy jol tehnıkasy bar. Osy jyly jańadan 57 tehnıka alyndy. Jyldyń aıaǵyna deıin taǵy 7 tehnıka alý josparlanǵan, — dedi kompanııa ókilderi.
Joldarda qoqys jınaý, jol boıyndaǵy sanıtarlyq gıgıenalyq toraptardy tazalaý jumystary kúndelikti atqarylady.
Eske salaıyq, buǵan deıin Qarqaraly men Balqashqa aparatyn joldar jańaryp jatqanyn jazǵanbyz.
