Qonaev qory Dinmuhamed Ahmetulynyń esimi qoıylǵan ýnıversıtetti sotqa berdi

Bul týraly qoǵamdyq qor Facebook jelisindegi paraqshasynda málimdedi.

— «D.A.Qonaev atyndaǵy halyqaralyq qor» qoǵamdyq qory Dinmuhamed Qonaev esimin paıdalaný boıynsha quqyqtardy qorǵaý týraly talap aryzben sotqa júgindi. Talap aryzdyń talaptarynyń biri — «Qonaev ýnıversıteti» JShS-niń fırmalyq ataýynan «Qonaev» ataýyn alyp tastaý, sondaı-aq quqyq ıelenýshiniń kelisiminsiz ony paıdalanýdy toqtatý, — delingen resmı málimdemede.

Qor Dinmuhamed Ahmetulynyń esimin jáne ózderine tıesili quqyqtardy tek quqyqtyq alańda qorǵaıtynyn jáne jáne Qazaqstan Respýblıkasynyń zańnamasyna sáıkes júzege asyrylatynyn atap ótti.

Aıta keteıik, Qonaev ýnıversıtetiniń resmı saıtynda kórsetilgen málimet boıynsha oqý ornynyń negizi 1993 jyly qalanǵan.

Sol jyly «D.A.Qonaev atyndaǵy kolledj» memlekettik emes joǵary oqý orny bolyp qurylǵan. Al 1994 jyly D. A.Qonaev atyndaǵy kolledj bazasynda «D.A.Qonaev atyndaǵy Qazaq gýmanıtarlyq ınstıtýty» qurylsa, 1995 jyly «D.A.Qonaev atyndaǵy gýmanıtarlyq ınstıtýt» bolyp qaıta quryldy. Al 2000 jylǵy 11 maýsymnan JOO «D.A.Qonaev atyndaǵy ýnıversıtet» atandy. 2023 jyly oqý ordasy Qonaev ýnıversıteti bolyp qaıta quryldy. Qazir JOO negizgi ǵımaraty Qurmanǵazy jáne Baıtursynov kósheleriniń qıylysynda ornalasqan.

Eske salaıyq, 2022 jyly Qapshaǵaı qalasyna Qonaev aty resmı túrde berildi.