Qonaev qalasynyń Bas jospary qabyldandy
Bas jospardyń negizgi maqsaty – onyń barlyq elementin ózara baılanystyra otyryp, ónerkásiptik-kommýnaldyq jáne rekreatsııalyq aımaqtardy utymdy bólip, jaıly jáne qaýipsiz tirshilik ortasyn qurý. Onda qalanyń perspektıvalyq shekarasyna qosylatyn eldi mekender men turǵyn úı keshenderi de eskeriledi.
Jospardy iske asyrýdyń eseptik kezeńi 2050 jylǵa deıin jalǵasady. Osy kezeńde qala óńirdiń zamanaýı kópfýnktsıonaldy ákimshilik, qarjy jáne mádenı, ónerkásip-ınnovatsııalyq, kólik-logıstıkalyq, ǵylymı-bilim berý ortalyǵyna, sondaı-aq Almaty aglomeratsııasynyń ınnovatsııalyq-ındýstrııalyq, azyq-túlik beldeýi, munaı óńdeý, gaz óńdeý jáne munaı hımııasy ortalyǵyna aınalýǵa tıis. Qalanyń Almaty oblysynyń basty týrıstik baǵyttarynyń biri, sýdaǵy demalys orny jáne sý sporty, týrızm, ań aýlaý jáne balyq aýlaý ortalyǵy retinde áleýeti de zor.
Alǵa qoıylǵan mindetterdi iske asyrý úshin Josparda ekonomıkalyq qyzmet, turǵyn úı qurylysy, ónerkásipti damytý, qorshaǵan ortany qorǵaý, bilim berý, densaýlyq saqtaý júıeleri, ınjenerlik, kólik ınfraqurylymy jáne kóshe-jol jelisi, kógaldandyrý, jylý, elektr, gaz, sýmen jabdyqtaý, sý tartý jáne t.b. jónindegi is-sharalar kórsetilgen.
Óńirdiń kólik-logıstıkalyq júıesin jańǵyrtýǵa jáne odan ári damytýǵa jaqsy serpin beriledi. Qonaev qalasynyń avıatsııa, temirjol, jol jáne sý kóligin qoldanýdaǵy kólik-logıstıkalyq júıesiniń mýltımodaldyǵy ony Almaty oblysyndaǵy ortalyq kólik-logıstıkalyq habqa aınaldyrmaq.
Jasyl elektr energııasyn óndirý kózderi – Qonaev qalasynyń ındýstrııalyq-ınnovatsııalyq damýynyń mańyzdy aspektisi.
Qalanyń áleýmettik salasyn damytýdaǵy basymdyq – ony Almaty oblysynyń jáne óńirdiń týrızm, demalys, sporttyq demalys ortalyǵy statýsyna sáıkes keletindeı etip damytý.
Jospardy iske asyrý kezinde jalpy aýdany 2 538,2 myń sharshy metr jańa turǵyn úı salynbaq.
Ózin-ózi jumyspen qamtyǵandar deńgeıin 18%-ǵa, jalpy jumyssyzdyq deńgeıin 4,2%-ǵa, jastar arasyndaǵy jumyssyzdyqty 3,8%-ǵa deıin tómendetý josparlanyp otyr.
Jospar aıasynda mektepke deıingi jáne jalpy bilim beretin mekemeler sanyn eki ese kóbeıtý kózdeledi.
Densaýlyq saqtaý júıesinde táýlik boıy jumys isteıtin statsıonarlardaǵy tósek-oryn sany, ambýlatorııalyq-emhanalyq kómek kórsetetin nysandar, sondaı-aq jedel járdem stantsııalary men kólikter sany eki ese artady.
Eske sala keteıik, Qonaev qalasy – 1970 jyly Qapshaǵaı SES qurylysy kezinde qalyptasqan Almaty oblysynyń ákimshilik ortalyǵy, Almaty oblysynyń ońtústik-shyǵys bóliginde ornalasqan. Qalada 54 907 adam turady. Aýdany — 56,03 sharshy km.
2022 jylǵy mamyrǵa deıin qala Úkimettiń 2010 jylǵy 26 aqpandaǵy qaýlysymen bekitilgen Qapshaǵaı qalasynyń Bas josparyna sáıkes damydy. 2022 jylǵy 3 mamyrda qala ataýy Qonaev bolyp ózgertildi.
2022 jylǵy 8 maýsymnan bastap Almaty oblysynyń jańa shekarasy belgilengennen keıin qala ákimshilik ortalyqqa aınaldy.
