Qonaev qalasynyń bas jospary bıylǵy jeltoqsanda daıyn bolady - mınıstrlik

ASTANA. QazAqparat – Qonaev qalasynyń bas josparyn ázirleý 2022 jyldyń jeltoqsanynda aıaqtalady. Bul týraly QR Indýstrııa jáne ınfraqurylymdyq damý mınıstrliginen málim etti, dep habarlaıdy QazAqparat.

Memleket basshysy Qasym-Jomart Toqaev Almaty oblysyna jasaǵan saparynda Qonaev qalasyn ekologııalyq taza, ómir súrýge qolaıly «aqyldy» shahar retinde qarastyratyn jańa bas josparyn daıyndaýdy tapsyrǵan bolatyn. Sondaı-aq oblys ortalyǵy men G-4 City aýmaǵynda arnaıy ekonomıkalyq aımaqtar (AEA) qurý júkteldi.

Budan bólek, Prezıdent óńirge pedagogıka kadrlaryn jáne dárigerlerdi tartý úshin olardy baspanamen qamtamasyz etý sharalaryn qabyldaý qajettigin atap ótti.

«Qazirgi kúnde Qonaev qalasynyń bas josparyn «Ýrbostıl» kompanııasy ázirlep jatyr. Bul jumystar bıylǵy jyldyń 20 jeltoqsanyna deıin aıaqtalmaq. Keıin zańnamaǵa sáıkes oblys ákimdigi jobalyq sheshimderdi qala turǵyndarymen ashyq talqylaýdy uıymdastyrady.

Sonymen qatar búginde arnaıy ekonomıkalyq aımaqtardyń tujyrymdamasyn daıarlaý jumystary da júrgizilýde. Bul oraıdaǵy jumystar aıaqtalǵan soń QR IIDM bekitilgen zańnamalyq talaptarǵa sáıkes AEA qurý týraly jumystarǵa kirisedi (eksperttik keńes, QRÚQ jobany maquldaý)», - delingen mınıstrlik málimetinde.

Aıta keterligi, búginde Almaty oblysynda turǵyn úı máselesin ońtaıly sheshýdiń tetikteri iske asyrylýda. Atap aıtqanda, jas mamandar «Alataý jastary» óńirlik baǵdarlamasy arqyly baspanaǵa qol jetkize alady.