Qonaev qalasyndaǵy kazınolar mıllıardtaǵan teńge salyq tóleýden jaltarǵan
Aıta ketetin jaıt, oıyn mekemeleriniń qyzmetin buryn eshkim keshendi teksermegen.
Tekserýmen 2019 jyldan bastap qazirgi ýaqytqa deıingi kezeń qamtylyp, nátıjeleri boıynsha zańnamanyń ártúrli salalarynyń kóptegen buzýshylyqtary anyqtaldy.
«Kazıno men oıyn mekemeleri aldyn ala esepteýler boıynsha mıllıardtaǵan teńgege salyq tóleýden jaltarǵan.
Qazirgi ýaqytta prokýratýranyń talaby boıynsha salyq qyzmetkerleri jospardan tys tekserýler júrgizýde. Olardyń nátıjeleri boıynsha jaltarýdyń túpkilikti somasy anyqtalatyn bolady.
Oıyn avtomattarynyń barlyq zaldarynda «Oıyn bıznesi týraly» Zańnyń 12-babynyń 6-tarmaǵynda kózdelgen, ıaǵnı klıentke 95%-dan kem emes utys paıyzynyń sáıkessizdigi anyqtaldy.
Shyn máninde, oıyn avtomattarynyń jeke zaldarynda kelýshilerdiń utys paıyzy 25%, 30% jáne 51% qurady.
Atalǵan sáıkessizdik nátıjesinde oıyn mekemeleriniń ústeme kirisi 2,6 mlrd teńgeden asty. Bul qarajat mekeme klıentteriniń utysyn quraýy tıis edi» delingen Almaty oblysy prokýratýrasynyń habarlamasynda.
Vedomstvonyń aqparatyna sáıkes, qazir Týrızm ındýstrııasy komıteti prokýratýranyń talaby boıynsha Ákimshilik quqyq buzýshylyq týraly kodekstiń 445-babymen mekemelerdi ákimshilik jaýapkershilikke tartý jumystaryn júrgizýde. Osy baptyń sanktsııasymen tabysty tárkileý jáne lıtsenzııanyń qoldanylýyn toqtata turý kózdelgen.
Oıyn avtomattary zalynyń birinde el aýmaǵynda tyıym salynǵan ınternet-kazınolardyń jumys isteýi anyqtaldy.
Atalǵan fakt boıynsha QK-niń 307-baby 3-bóligi 2-tarmaǵymen sotqa deıingi tergeý amaldary júrgizilýde.
Oıyn bıznesi, eńbek zańnamasy, órtke qarsy jáne sanıtarlyq-epıdemıologııalyq normalar salasyndaǵy buzýshylyqtar da anyqtaldy.
Prokýratýranyń talabymen ýákiletti memlekettik organdar tarapynan kinálilerdi ákimshilik jaýapkershilikke tartý jáne buzýshylyqtardy joıý týraly nusqamalardy tapsyrý úshin tekserýler jalǵasýda.
Aıta keteıik, buǵan deıin jekelegen memlekettik qyzmetshilerdiń qumar oıyndarǵa qatysý máseleleri boıynsha tıisti tekserýler júrgizilip jatqanyn jazǵan edik.