Qonaev qalasynda 1 mln sharshy metrden astam baspana salý qajet – ákim

QONAEV. QazAqparat – Qonaevta 1 mln sharshy metrden astam turǵyn úı salý qajet. Bul týraly qala ákimi Nurlan Qumataev baspasóz týry barysynda aıtty, dep habarlaıdy QazAqparat tilshisi.

Nurlan Qumataevtyń aıtýynsha, qaladaǵy turǵyn úı qorynyń jalpy aýdany - búginde 3,2 mln sharshy metr, taǵy 1 mln sharshy metr qajet.

«Sebebi bizde jańa jumys oryndary ashylyp, adamdar kelip jatyr. Bul - jańa oblys ortalyǵy. Ótken jyly bekitilgen bas jospar men egjeı-tegjeıli josparlaý jobasy boıynsha qazir jańadan úıler salyp jatyrmyz», - dedi ákim.

Sonymen qatar, ol osy jyldyń tamyz aıynan bastap Qonaevta sáýlet jáne qala qurylysy bóliminiń tapsyrysy boıynsha 60 páterlik úsh turǵyn úıdiń qurylysy bastalǵanyn atap ótti.

«Nurly jer» baǵdarlamasy boıynsha jalpy alańy 50 gektar jerge úı salamyz. Biz qazirdiń ózinde oryndardy anyqtap qoıdyq. Sondaı-aq, jeke qurylys salýshylar turǵyn úı qurylysyna ınvestıtsııa salýǵa nıet bildirdi. Biz bul baǵytta belsendi jumys isteı bastadyq. Qazirgi ýaqytta 107 úıdiń qurylysyn josparlap qoıdyq, onyń 13-i bıýdjet esebinen, qalǵany jeke kompanııalardyń esebinen salynady», - dedi ákim.

Shahar basshysynyń sózinshe, 10-shaǵynaýdanda 900 oryndyq mektep qurylysy júrip jatyr.

Ol kelesi jyldyń naýryz aıynda paıdalanýǵa beriledi. Sonymen qatar, jaqyn arada taǵy eki mektep pen 150 kelýshige arnalǵan balalar emhanasyn salý josparda.

«Qazir qalanyń bas josparyn ázirlep jatyrmyz. Ol bekitilgennen keıin áleýmettik nysandar, ákimshilik ǵımarattar men kásipkerlik nysandarynyń qurylysyn josparlaımyz», - dedi ol.