Qonaev qalasynyń jalǵyz ardageri 104 jasynda ómirden ótti
QONAEV. KAZINFORM — Soǵys jyldary medbıke bolǵan UOS ardageri Oksana Betebaeva ómirden ozdy.
Qonaev ákimdiginiń málimetinshe, Oksana Betebaeva kózi tiri Qonaev qalasyndaǵy jalǵyz UOS ardageri edi. Ol 1920 jyly 7 qazan dúnıege kelgen. Medıtsınalyq ýchılışeni támamdaǵan soń, 1941 jyly soǵysqa shaqyrylyp, gospıtalde medbıke qyzmetin atqarǵan. Ardager ІІ dárejeli UOS ordenimen marapattalǵan.
Soǵystan keıin Oksana Betebaeva kúıeýimen birge 1948 jyly Berlındi qalpyna keltirýge barǵan. Sol jerde ulyn bosanady. 1949 jyly Panfılov aýdanyna kóship kelgen. Sonda joldasy muǵalim, Oksana medbıke qyzmetin atqarǵan. Odan keıin Qonaevqa qonys aýdarǵan.
Eske salaıyq, buǵan deıin Prezıdent UOS ardageri Ábdiǵalı Qaımoldınniń otbasyna kóńil aıtý jedelhatyn joldady.