Qonaev qalasynyń ákimi Nurlan Qumataev óz erkimen jumystan ketti

QONAEV. KAZINFORM - Qonaev qalasynyń ákimi Nurlan Qumataev basqa qyzmetke aýysýyna baılanysty 28 naýryzda óz erkimen jumystan ketti.

Almaty oblysy ákimdiginiń baspasóz qyzmeti qala ákimi laýazymyn atqarǵan kezeńde Qumataev birqatar mańyzdy ınfraqurylymdyq jobany iske asyrý arqyly, qala tarıhynda edáýir iz qaldyrǵanyn habarlady. Mańyzdy jetistikterdiń ishinde - qalalyq bý qazandyǵyn mazýttan tabıǵı gazben qoldanýǵa aýystyryp, qala turǵyndaryn ystyq sýmen turaqty túrde qamtamasyz etýi bar.

«Nurlan Qumataevtyń basshylyǵymen Qonaev qalasynyń 10-shy shaǵyn aýdanyn damytýdyń jospary júzege asyryla bastady. Onyń kezinde mektep qurylysy, júrgizilip jatqan kóppáterli turǵyn úıler qurylysy jáne keń jolaqty jol jelisi salyna bastady. Sonymen qatar, Qumataev «Ardager» jáne «Samal» shaǵyn aýdandaryn damytý jobalaryna bastamashylyq jasady, qalanyń bul aımaqtarynda bıyl saıajaı alaptaryn qamtıtyn ınjenerlik-kommýnıkatsııalyq júıelerdi júrgizý bastalady», - dep habarlady Almaty oblysynyń ákimdigi.

Sondaı-aq Nurlan Qumataevtyń basqarý kezeńinde jylý jelilerin tolyq jańǵyrtý jumystary júzege asyryldy, bul qalany jylýmen qamtamasyz etýge kepildik berdi. Sonymen qatar, turǵyndardy aýyz sýmen qamtıtyn Nıkolaev jer asty sýlary ken oryndarynda jeti uńǵyma ázirlendi. Sheńgeldi alaptary sýarmaly júıesiniń qaıta qurylysy jáne qala boıynsha káriz sorǵy stantsııalaryn jańǵyrtý júzege asyryldy.

Qumataev oblys ortalyǵyn Taldyqorǵannan Qonaevqa aýystyrý barysynda da, memlekettik organdar men personalyn jaıly ornalastyryp, belsendilik tanytty.

Osyǵan deıin Qonaev ákimdiginde kadrlyq aýys-túıis bolǵanyn jazdyq.