Qonaev qalasynda «Jańa Іle» atty týrıstik aýdan ashylady
Qonaev qalasynda keleshekte «Jańa Іle» atty týrıstik aýdan ashylady. Bul týraly Almaty oblysynyń ákimi Marat Sultanǵazıev «Jibek Joly» telearnasyndaǵy «Ýáde» baǵdarlamasynda aıtty, dep habarlaıdy Kazinform.
«Ádette qarjy bólinip, jańa qala salynǵanda eski qala eleýsiz, eskerýsiz qalyp, tozyp ketýi qalypty jaǵdaıǵa aınaldy. Mysaly Semeıde «Eski Semeı», «Jańa Semeı» bólikteri bar, Astanada oń jaǵalaý men sol jaǵalaý paıda boldy. Siz osyndaı qatelikterdi qaıtalamaısyz ba? Turǵyndardyń bul ýaıymy oryndy sııaqty», - dedi baǵdarlama júrgizýshisi Erbolat Muhamedjan.
Óz kezeginde oblys ákimi Qonaev qalasynyń damýynyń eki kezeńi bar ekenin aıtty. Qalanyń qazirgi aýmaǵynda barlyq ákimshilik ǵımarattar salynady.
«Bizde «Jańa Іle» degen aýmaq bar, ol perspektıvada, ekinshi kezekte tur. Qazir Qonaev qalasy turǵan jerdi tolyq abattandyrýdan ótkizip, ákimdik, polıtsııa bólimshesi, áleýmettik ǵımarattar syndy nysandardy sonda turǵyzamyz. Óıtkeni halyq sonda turyp jatyr. Onda ıgeretin jer de kóp, jasalatyn jumys ta kóp. Keıinnen Qapshaǵaı jaǵalaýy bar, ony da birinshi kezekte abattandyrýdy bastadyq. Bul jumystardyń bári bitken soń kelesi kezeńde «Jańa Іle» aýmaǵyn damytý bastalady. Onda ákimdik ǵımarattary bolmaıdy, demalys oryndary, qonaq úıler, sport keshenderi, turǵyn úıler bolady. Almatylyqtar sol jerge kelip, tolyq demalyp ketetindeı týrıstik ortalyq bolady», - dedi Marat Sultanǵazıev.
Buǵan deıin Almaty oblysynyń ákimi mektep jasyndaǵy balalar sany jyl saıyn 13 myńǵa kóbeıetinin, óńirde baspana salý kórsetkishi de artyp kele jatqanyn aıtqan edi.
Sondaı-aq, oblystyń 4 paıyzǵa jetpeıtin jerinde ǵana sý únemdeıtin tehnologııalar qoldanylady. Endi óńirdiń ózinde sý únemdeý apparattaryn shyǵaratyn zaýyttar ashylmaq.
