Qonaev qalasynda Naýryz kerýeni júrip ótti
QONAEV. KAZINFORM - Naýryz merekesi qarsańynda Qonaev qalasynda Naýryz-kerýen júrip ótti. Kerýen tizbeginde túıeler, at arba, kúımeler men avtokólikter boldy. Zııaly qaýym ókilderi, aqsaqaldar, ájeler, etno-mádenı birlestikterdiń ókilderi, teatr ártisteri men jastar, engen kerýenshiler áýeli alańǵa jınaldy.
Merekelik kósh-kerýeniniń shartty ataýy – «Yntymaq». Maqsaty – oblys halqynyń tutastyǵyn men aýyzbirshiligin kórsetý.
Búkil aýdandardy qamtıtyn kóshke 3000 adam qatysty.
Bir aýdan – bir kósh. Ár aýdannyń tarıhı, mádenı, geografııalyq erekshelikteri eskerile otyryp, árqaısysyna belgili bir taqyryp berildi.
Kósh-kerýen jol boıy bir-birine qosylyp, tolyǵyp otyrdy jáne qazaqtyń kósh dástúri qatań saqtaldy.
Ortalyqqa kelip jetken kósh-kerýendi óńir jurtshylyǵymen birge Almaty oblysynyń ákimi Marat Sultanǵazıev jáne oblystyń zııaly qaýym ókilderi men qurmetti aqsaqaldary kútip aldy.
Jınalǵan kópshilik jyl basynyń basty dámi – Naýryz kójeden dám tatty. Kúbiden túsken maı men tabada pisken ystyq nan, baýyrsaqtan aýyz tıdi.
Kóshke kórisý sııaqty dástúrler qamtylyp merekeniń máni odan ári ashyla tústi. Ár kóshke 1 mınýtqa deıin ýaqyt berilip, ózderine berilgen taqyryptar boıynsha ónerin kórsetip, ıgi sharanyń mańyzyn arttyra tústi.
Merekelik is-sharada oblys ákimi Marat Sultanǵazıev jurtshylyqty Ulystyń uly kúnimen quttyqtap, izgi nıetin bildirdi.
«Qurmetti jerlester! Bıyl Naýryz meıramy Qasıetti Oraza aıyna tuspa-tus kelip otyr. Barsha musylman qaýymyna tutqan Orazanyń qabyl bolýyn tileımin. Áz-Naýryz yntymaǵymyzdy nyǵaıtyp, asqar asýlardy baǵyndyrýǵa jeteleı bersin. Ár shańyraqqa qýanysh pen shattyq, mol baqyt ákelsin. Egemendi elimizdiń irgesi berik, mártebesi bıik, bolashaǵy jarqyn bolsyn. Ulys oń bolsyn, meıram qutty bolsyn!», – dedi ákim.
Osylaısha óńirdiń áleýmettik-ekonomıkalyq damýyna úles qosyp júrgen azamattaryn Ulystyń uly kúninde «Aımaqqa eńbegi úshin» tósbelgisimen marapattap, óziniń quttyqtaý sózin jaqsy bir saltanatty rásimmen aıaqtady.
Oblys basshysynyń quttyqtaýynan keıin «Jańa kún» atty prolog bastaldy.
150-200 adam qatysatyn prolog Kúndi qarsy alý, kóktemniń kelýi, tabıǵattyń oıanýy, Qydyr atanyń bata berýi sııaqty dástúrlerdi qamtydy.
Teatrlandyrylǵan prolog-qoıylymǵa belgili ánshi Móldir Áýelbekova men «Rabbat» etnotoby, sondaı-aq 70-ke jýyq bıshi bı bılep, sahnada erekshe halyqtyq merekeniń atmosferasy paıda boldy.
Ary qaraı kontserttik baǵdarlamada halyq súıip tyńdaıtyn «Dos Muqasan», Ábdijappar Álqoja, Shába Ádenqul, Mıras pen Quralaı sııaqty belgili ánshiler án aıtty.
Al keshki merekelik kontsertte Erkesh Hasen, Nursultan Nurberdıev sııaqty jastardyń súıikti ánshileri óner kórsetip kesh kórigin qyzdyrady.
