Qonaev qalasynda kópirden sýǵa sekirgen azamat qutqaryldy

ASTANA. KAZINFORM — Búgin «112» jelisine Almaty — Óskemen avtojolynda, Qapshaǵaı sý elektr stantsııasy mańynda er adamnyń kópirden sýǵa sekireıin dep turǵany týraly habarlama tústi, dep habarlaıdy Qonaev qalasy TJB baspasóz qyzmeti.

Vedomstvo atap ótkendaı, oqıǵa ornyna TJM qutqarýshylary, psıholog mamany jáne polıtsııa qyzmetkerleri jedel jetip, azamatpen sóılesip, ony tynyshtandyrýǵa tyrysty. Alaıda er adam kenetten sýǵa sekirip ketti.

— Qutqarýshylar qaıyqpen sýǵa túsip, azamatty der kezinde qutqaryp, alǵashqy medıtsınalyq kómek kórsetti. Sodan keıin jedel járdem qyzmetkerlerine tapsyrdy, — delingen habarlamada.

Qonaev qalasynyń jedel — qutqarý jasaǵynyń qutqarýshylary tótenshe jaǵdaı týyndaǵan jaǵdaıda 112 nómirine qońyraý shalý qajettigin eske saldy.

Osyǵan deıin Aqtóbede polıtsııa qyzmetkerleri kúıeýine qoshtasý hatyn jazǵan áıeldi qutqarǵanyn jazǵan edik.