Qonaev-Almaty baǵytyndaǵy poıyz kún saıyn tańǵy 6-da júredi

ALMATY. QazAqparat - «Jolaýshylar tasymaly» AQ 2022 jylǵy 11 qarashadan bastap Qonaev-Almaty baǵyty boıynsha № 6906/6907 poıyzdy jolǵa shyǵarady. Dızeldi temirjol poıyzy kún saıyn Qonaevtan saǵat 06.00-de, Almaty stansasynan keri qaraı saǵat 19.00-de júredi. Jol júrý ýaqyty – 1 saǵat, 17 mınýt, dep habarlaıdy QazAqparat «Qazaqstan temir joly» UK» AQ baspasóz qyzmetine silteme jasap.

Bul baǵytty qarjylandyrý aǵymdaǵy jyldyń sońyna deıin Ulttyq tasymaldaýshy esebinen júzege asyrylady. Qazirgi ýaqytta Indýstrııa jáne ınfraqurylymdyq damý mınıstrligimen jáne Almaty oblysynyń ákimdigimen birlese otyryp, atalǵan baǵytta tasymaldaýshynyń shyǵyndaryn sýbsıdııalaý boıynsha 2023 jylǵa tender ótkizý jumystary júrgizilýde.

Joba Prezıdent Qasym-Jomart Toqaevtyń Almaty oblysyna jumys sapary barysynda bergen tapsyrmasy boıynsha júzege asyrylýda.

«Basty mindetterdiń biri – oblystyń kóliktik-logıstıkalyq áleýetin arttyrý. Úkimet ákimdikpen birlese otyryp, kólik jelisin jaqsartý boıynsha keshendi sharalar ázirleýi tıis. Jolaýshylar men júk tasymalynyń múmkindigin keńeıtý úshin jaǵdaı jasaý qajet. Atap aıtqanda, Almaty men Qonaev arasyndaǵy jol jelisimen qatar temirjol jelisin de damytý qajet», - dedi Memleket basshysy.

Bıletterdi BILET.RAILWAYS.KZ saıty nemese «QTJ bıletteri» mobıldi qosymshasy arqyly onlaın satyp alýǵa bolady.

Buǵan deıin IIDM baspasóz qyzmeti qala mańyndaǵy jańa Almaty-Qonaev baǵyty boıynsha táýligine bir ret júretin poıyz Almaty-1 stansasynan saǵat 06:44-te shyǵyp, Qapshaǵaı stansasyna 08:35-te keletinin, sondaı-aq Qapshaǵaı stansasynan 19:15-te jóneltilip, Almaty-1 stansasyna 20:50-de jetetinin habarlaǵan bolatyn.