Qonaev-Almaty baǵytyndaǵy poıyz: suranys qandaı jáne baǵa ózgerdi me
ALMATY. KAZINFORM — 2022 jyldyń qarashasynda Memleket basshysynyń tapsyrmasy boıynsha Qonaev-Almaty baǵytyndaǵy poıyz jolǵa shyqty. Osy eki jyl ishinde qandaı ózgerister boldy, jolaýshylar sany artty ma, jol júrý aqysy qansha? Bul saýaldarǵa Kazinform tilshileri jaýap izdep kórdi.
2022 jyldyń 11 qarashasynda Qonaev-Almaty baǵytynda alǵashqy 6906/6907 qalaaralyq poıyzy jolǵa shyqty. Sol kezde «Qazaqstan temir joly» UK» AQ baspasóz qyzmeti dızeldi temirjol poıyzy kún saıyn Qonaevtan saǵat 06.00-de, Almaty stansasynan keri qaraı saǵat 19.00-de júretinin habarlaǵan edi. Jol júrý ýaqyty — 1 saǵat, 17 mınýt.
«Qazir poıyz 11 temir jol stansasyn qamtıdy, onyń ishinde Qonaev, Almaty-1 jáne Almaty-2 stansasy bar. Kúnine 3 vagon júredi, jalpy oryn sany 156. Keste kelesideı: Qonaev qalasynan taǵy saǵat 05:27, Alataý qalasynan 05:56, Almaty-2 — 07: 15 keledi. Keri baǵytta: Almaty-2 stansasynan saǵat 18:40 jóneltilip, Qonaev qalasyna saǵat 20:30 jetedi. Jol júrý aqysy eresek adamdar úshin 500 teńge, balalarǵa 250 teńge (50% jeńildikti qosqanda). Bul baǵyt boıynsha kúnine orta eseppen 50-60 jolaýshy júredi. Jazda jolaýshylardyń kóbeıýine baılanysty vagondar sany 6-ǵa deıin artady», — dep jaýap berdi oblys ákimdiginiń baspasóz qyzmeti.
Atalǵan jolaýshylar poıyzyna «Turan Ekspress» JShS qyzmet kórsetedi. Poıyz dızeldik otynmen júredi, jyldamdyǵy 80 km/saǵ deıin jetedi.
Buryn bir jaqqa jol júrý aqysy 450 teńge bolatyn.
Eske salaıyq, 2022 jyldyń qazan aıynda Qasym-Jomart Toqaev Almaty oblysy halqymen kezdesýinde oblystyń kólik-logıstıka áleýetin arttyrý — basty basymdyqtyń biri ekenin atap ótken bolatyn.
Bir aıdan keıin Memleket basshysynyń tapsyrmasy oryndalyp, Qonaev-Almaty baǵytyndaǵy poıyz iske qosyldy.
