Qonaev ákimdigi josyqsyz merdiger kompanııany sotqa berdi

ALMATY. KAZINFORM – Qonaev qalasynyń ákimdigi birneshe nysanda qurylys jumystaryn ýaqytyly aıaqtamaǵan merdiger uıymdy sotqa berdi. Bul týraly qala ákimdiginiń baspasóz qyzmeti habarlady.

Ákimdik málimetine sáıkes, «SHEBERBUILD» JShS-y shahardaǵy jylý júıelerin aýystyrý jáne Q.Qaısenov atyndaǵy №4 orta mektepti kúrdeli jóndeýden ótkizý, №10 shaǵyn aýdanda 3 turǵyn úıdi salý boıynsha konkýrsty utyp alǵan. Onyń ishinde oqý oshaǵynyń kúrdeli jóndeýi 2024 jyldyń 30 sáýirinde aıaqtalýy kerek bolǵan. Alaıda kompanııa bul ýaqytqa jumystardy aıaqtap úlgermeı, jumystyń tek 75 paıyzyn ǵana oryndaǵan. Sondyqtan qalalyq bilim bólimi kompanııanyń isin sotqa jiberdi.

- Seriktestik №2,4,5 shaǵyn aýdandardyń jylý jelisin aýystyrýdy osy jyldyń qańtarynda mejesine jetkizýi kerek edi. Biraq byltyrǵy qyrkúıek aıynan kompanııa jumysy oryndalý kestesinen keshige bastaǵan. Osyǵan baılanysty qalalyq TÚKSh bólimi kompanııaǵa birneshe ret hat jibergen. Nátıje bolmaǵan soń, isti Almaty oblysy mamandandyrylǵan aýdanaralyq ekonomıkalyq sotyna joldaý josparlanyp otyr. Munda TÚKSh bólimi qos taraptyń kelisimshartyn buzý ári merdigerdi josyqsyz dep taný týraly talap qoıýdy kózdeýde.

Al №10 shaǵyn aýdandaǵy 180 páterli turǵyn úıler byltyr jeltoqsanda qoldanysqa berilýi kerek bolǵan. Qurylys bólimi birneshe ret hat joldap, keıin sotqa berip, merzimdi 20 maýsymǵa deıin sozdy. Qazirgi tańda 90 paıyz jumys aıaqtaldy, - dep habarlady Qonaev qalasy ákimdiginiń baspasóz qyzmetinen.