Qonaev ákimdigi jylý jelilerin ýaqtyly aýystyrmaǵan kompanııany sotqa berdi
QONAEV. KAZINFORM — Qonaev qalasynyń ákimdigi qaladaǵy birneshe nysannyń qurylysyn utyp alǵan josyqsyz merdiger kompanııamen kelisimshartty buzdy.
«SHEBERBUILD» JShS-y № 2,4,5 shaǵyn aýdandarynyń jylý jelilerin aýystyrý jobasyn utyp, 2023 jyldyń sáýir aıynda kelisimshartqa qol qoıǵan. Biraq óz mindetterin ýaqtyly oryndamaǵan.
— Merziminen keshiktirilip jatqan jumystar boıynsha TÚKSh bólimi birneshe ret hat joldap, merdigerdiń isi sotta qaraldy. Sońǵy sheshim ákimdiktiń bólimi tarapynan kelisimshartty birjaqty buzý boldy, — dep habarlady ákimdikten.
Qazirgi ýaqytta jylý jelilerin aýystyrý boıynsha memlekettik satyp alý portalynda jańadan konkýrs oınatylyp, jańa kompanııa óz jumysyn bastap ketti. Ákimdik málimetine sáıkes, qazir jylý qubyrlarynyń durys jalǵanyp, jalǵanbaǵany tekserilip, qazylǵan jerler jabylyp jatyr. Jalpy alǵanda qurylys-montajdaý jumystarynyń 70%-y aıaqtalǵan.
Sondaı-aq, Qonaev ákimdigi «SHEBERBUILD» JShS-ymen № 10 shaǵyn aýdanda úsh 60 páterlik kópqabatty úı salý týraly kelisimshartty buzdy.
— Qazirgi tańda qurylys-montajdaý jumystarynyń 95 paıyzy aıaqtalǵan. «SHEBERBUILD» JShS-men sharttardyń oryndalmaýyna baılanysty kelisimshart buzyldy. Nysannyń qurylysyn aıaqtaý maqsatynda «Sanýr Stroı-A» JShS-men 2024 jyldyń qyrkúıeginde jańa shartqa qol qoıyldy. Kóppáterli turǵyn úı 30 qarashaǵa deıin qoldanysqa beriledi dep josparlanyp otyr, — dep habarlady ákimdikten.
Eske salaıyq, buǵan deıin Almatyda zańsyz salynǵan iri qoıma buzylyp jatqanyn jazǵanbyz.
