Konkımen júgirýshi Ekaterına Aıdova Kanadada «kúmis» enshiledi
ASTANA. QazAqparat - Kanadanyń Kalgarı qalasynda ótip jatqan konkımen júgirýden halyqaralyq týrnırde qazaqstandyq Ekaterına Aıdova ekinshi oryn ıelendi, dep habarlaıdy QazAqparat.
QR Ulttyq Olımpıadalyq komıtetinen málim etkendeı, Aıdova 3 myń metrdi 4: 06: 12 ýaqyt kórsetkishinde júgirip ótip, ekinshi orynǵa taban tiredi.
Ókinishke qaraı, osy qashyqtyqta 2001 jyldan beri ózgertilmegen Qazaqstan rekordyn jańartýǵa 1.1 sekýnd jetpeı qaldy.
100 metrge júgirýden Aleksandr Klenko - ekinshi, Ivan Arjanıkov 20-oryn ıelense, 500 metrde sportshylar tıisinshe 11-shi jáne 18-shi satydan kórindi.
10 myń metrge júgirgen staıerler jarysynda Dmıtrıı Morozova 4-oryn ıelenip, el rekordyna túzetý engizdi. Ol 13: 03: 94 ýaqyt kórsetkishin tirkedi.
