Konkımen júgirý sportynan Álem kýbogy kezeńiniń medaldarynda «Báıterektiń» músini paıdalanyldy
ASTANA. 7 qarasha. QazAqparat /Gúlmıra Alıakparova/ - Qazaqstannyń teńge saraıy Astana qalasynda qarashanyń aldaǵy 25-27 kúnderi ótetin Konkımen júgirý sportynan Álem kýbogynyń ІІ kezeńiniń jeńimpazdary úshin medaldardy ázirleýge kiristi.
Bul týraly jarystardy uıymdastyrý komıtetinen málim etti.
Qazaqstandaǵy Konkımen júgirý sportynan Álem kýbogynyń ІІ kezeńiniń medaldaryna «Báıterektiń» músini paıdalanylsa, jarystardyń resmı tulǵasy - halyqaralyq dárejedegi sport sheberi, Azııa oıyndary men Azııa chempıonattarynyń qola júldegeri (2005; 2009 jyldar), Azııa chempıonatynyń jeńimpazy (2006 jyl), 1500, 5000 jáne 10 000 metr qashyqtyqtarda Qazaqstannyń rekordshysy, Olımpıadalyq oıyndardyń eki márte qatysýshysy (Týrın-2006, Vankýver-2010) Dmıtrıı Babenko boldy. Onyń fotosýretteri afıshalarda qoldanylmaq.
Sheńber tárizdi medaldyń dıametri - 70 mm, qalyńdyǵy - 4 mm. Onyń bet jaǵynda - Álem kýbogynyń logotıpi men konkımen júgirý sportyn kórsetetin pıktogramma beınelengen. Teris betinde - Astananyń sımvoly - «Báıterek» monýmenti jáne jarystardyń ótetin ýaqyty belgilendi.
Onymen birge, medaldyń jáne onyń nagradalyq lentasyn bezendirýde ulttyq oıýlar men Qazaqstannyń memlekettik Týynyń ornamentteri paıdalanyldy.
Konkımen júgirý sportynan Álem kýbogynyń Astanada ótetin kezeńinde barlyǵy 12 jıyntyq medal sarapqa salynady. Jarystarǵa 30-dan astam eldiń sportshylary qatysady.
