Konkımen júgirý kópsaıysy boıynsha Qazaqstan rekordy jańartyldy
ASTANA. 29 jeltoqsan. QazAqparat - Astanadaǵy konkımen júgirý kópsaıysy boıynsha Qazaqstan chempıonatynda jańa rekordqa qol jetkizildi.
«Alaý» muz aıdyny saraıynyń resmı saıty málimetine qaraǵanda, Roman Krech chempıonat aıasynda 500 metr qashyqtyqta kóp satyly klassıkalyq jarysta Qazaqstan rekordyn ornatty. Ol óz rekordyn 00,35 sekýndke jaqsartty. Budan burynǵy rekord «Alaý» muz aıdyny saraıynda 35, 50 kórsetkishinde bolatyn. Keshegi jetistik 35, 15 ýaqytymen belgilendi
Ulttyq quramanyń bas jattyqtyrýshysy Vadım Saıýtınniń aıtýynsha, R. Krech qol jetkizgen jańa rekord 2011 jylda qurama sportshylarynyń arasynda eń joǵary kórsetkish bolyp tabylady.
Budan buryn habarlanǵandaı, 27 jeltoqsanda Astanadaǵy «Alaý» muz saraıynda konkımen júgirý kópsaıysy boıynsha Qazaqstan Respýblıkasynyń chempıonaty bastalǵan edi. Eki kúnge sozylatyn jarystarǵa Vadım Saıýtınniń basshylyǵyndaǵy ulttyq qurama jáne oblystar men qalalardyń komandalary qatysty.
Konkımen júgirý kópsaıysynan Qazaqstan chempıonaty Azııa qurlyǵy elderinen kvalıfıkatsııalyq jarystarǵa irikteý bolyp tabylady. Atalmysh kvalıfıkatsııa jeńimpazdary óz kezeginde 2012 jyly Máskeýde ótetin klassıkalyq kópsaıystan Álem chempıonatyna qatysa alady. Sondaı-aq, QR chempıonaty barysynda, kvalıfıkatsııamen birmezgilde ótetin - jeke qashyqtyqtyqtar boıynsha Azııa chempıonatyna qatysatyn Qazaqstannyń quramasy jasaqtalmaq.
Eske salaıyq, klassıkalyq kópsaıys boıynsha Álem chempıonatynyń kvalıfıkatsııalyq irikteýine qatysýǵa Qazaqstanda 4 kvota bar. Jeke qashyqtyqtar boıynsha Azııa chempıonatyna bes áıel men bes er sportshy tańdap alynýy kerek. Kópsaıystan Qazaqstan chempıonaty barysynda sonymen qatar, Óńirlik álem kýbogyna qatysý úshin eń úzdik jas sportshylar irikteletin bolady. Azııa elderiniń jasóspirimderi arasyndaǵy Óńirlik álem kýbogy 2012 jyldyń 7-8 qańtary kúnderi «Alaý» Muz saraıynda ótedi.
