«Konkıdiń otany - Qazaqstan!» - respýblıkalyq basylymdarǵa sholý

Keshe Aqordada Qazaqstan Respýblıkasynyń Prezıdenti Nursultan Nazarbaev Qazaqstanǵa saparmen kelgen Norvegııa Koroldiginiń Kron-hanzadasy Hokon Magnýspen kezdesti. Kezdesý barysyndaǵy áńgimelesýde taraptar eki memleket arasyndaǵy yntymaqtastyq oıdaǵydaı damyp kele jatqandyǵyn atap ótti. Osyǵan oraı «Egemen Qazaqstan» gazetinde «Ekijaqty qatynastardy tereńdetýdiń múmkindigi mol» degen taqyryppen maqala jarııalandy. Basylymnyń jazýynsha, Norvegııa Koroldigi 1992 jyldyń basynda Qazaqstannyń táýelsizdigin alǵashqylardyń biri bolyp tanydy. Sodan bergi ýaqytta eki memleket arasyndaǵy qatynas turaqty damyp keledi. Qazaqstan óziniń Norvegııadaǵy elshiligin ashty. Endi Norvegııa Qazaqstandaǵy elshiligin ashqaly otyr. Bul Qazaqstan men Norvegııanyń tyǵyz yntymaqtastyq jasaýyna qyzmet etedi.

Norvegııa Koroldiginiń Kron-hanzadasy Hokon Magnýstyń elimizge saparyn «Aıqyn» gazeti de egjeı-tegjeıli jazǵan. Basylym mártebeli meımannyń «Qazaqstannyń halyqaralyq mańyzy artyp kele jatyr. Al sizderdiń EQYU-ǵa tóraǵalyǵyńyz - Qazaqstannyń álemdik sahnadaǵy ósip kele jatqan yqpalynyń nyshany, belgisi bolyp tabylady», degen sózin keltirgen.

«Egemen Qazaqstan» gazetiniń QR Prezıdenti baspasóz qyzmetine silteme jasap habarlaýynsha, Memleket basshysy Nursultan Nazarbaev Qazaqstan kásiporyndary men qaýymdastyǵynyń «Tabıǵat» ekologııalyq odaǵynyń tóraǵasy Mels Eleýsizovti qabyldaǵan. «M.Eleýsizov Prezıdentti 2009 jyly jeltoqsanda Kopengagende ótken jáne halyqaralyq klımattyq forým tarıhynda iri oqıǵaǵa aınalǵan BUU Negizdemelik konventsııasy taraptarynyń 15-shi konferentsııasynyń jumysyna qatysqandyǵynan habardar etti. Kezdesý barysynda sondaı-aq Qazaqstandaǵy ekologııalyq jaǵdaıǵa jáne qorshaǵan ortany qorǵaý jónindegi jumystarǵa baılanysty keń kólemdegi máseleler talqylandy», dep jazady basylym.

Aqpannyń 5-inde 93 jasqa qaraǵan shaǵynda asa kórnekti qoǵam qaıratkeri, úlken júrekti azamat, halqymyzdyń qádirmendi qarııasy Báıken Áshimov dúnıeden ozdy. Osyǵan oraı Memleket basshysy Nursultan Nazarbaev marqumnyń otbasy men týǵan-týystaryna kóńil aıtyp, jedelhat joldady. Sonymen qatar elimizdiń bedeldi qoǵam qaıratkerleri, ǵalymdary men jazýshylary marqummen «Egemen Qazaqstan» basylymy arqyly baquldasty.

EQYU-nyń Іs basyndaǵy tóraǵasy, Qazaqstan Respýblıkasynyń Memlekettik hatshysy - Syrtqy ister mınıstri Qanat Saýdabaev Amerıka Qurama Shtattaryna sapary sheńberinde AQSh-tyń Memlekettik hatshysy Hılları Klıntonmen kezdesken. «Hılları Klınton Qazaqstannyń EQYU-ǵa tóraǵalyq etýin AQSh-tyń qoldaıtynyn jáne Qazaqstanmen eki aradaǵy yntymaqtastyqtyń tereńdeı túsýine múddeli ekendikterin aıta kelip, Qazaqstan Prezıdenti N.Nazarbaevtyń Aq úı basshysynyń shaqyrýyn qabyl alǵanyna rızashylyǵyn bildirdi», dep jazady «Egemen Qazaqstan» gazeti. Q.Saýdabaevtyń AQSh-qa sapary jaıynda «Ekijaqty yntymaqtastyqqa múddelilik tanytyldy» atty maqaladan egjeı-tegjeıli tanysa alasyzdar.

«Eń alǵashqy konkı Eýropa men Reseıde emes, Qazaqstanda tabylǵan. tarıhshylardyń aıtýynsha, b.z.d. HІІ ǵasyrda, ıaǵnı úsh myń jyl buryn Kókshetaý óńirin mekendegen taıpalar konkı tebe bilgen. Sporttyń qadirin erte túsingen qola dáýiriniń adamdary sol kezdiń ózinde órkenıetke qadam basqan syńaıly», dep jazady «Alash aınasy» gazeti. Basylym jar salyp otyrǵan jaǵymdy jańalyq qyzyqtyrsa, búgingi sanynda «Konkıdiń otany - Qazaqstan!» degen taqyryppen basylǵan maqalaǵa nazar salyńyz.

***

«Medvedev Qazaqstandy úlgi etti». Osy taqyryppen berilgen «Aıqyn» gazetiniń maqalasynda, keshe Úkimet basshysy Kárim Másimovtiń tóraǵalyǵymen ótken Ekonomıka jáne bıýdjettik josparlaý mınıstrliginiń alqa májilisi keńinen jazylǵan. Basylymnyń jazýynsha, elimizdiń Úkimeti alda memlekettik basqarý júıesin jetildirýdi qolǵa almaq. Jarııalanym atalǵan vedomstvonyń 2009 jylǵy jumystaryna jan-jaqty toqtalyp, 2010 jylǵa josparlary jaıynda baıandaǵan. Sonymen qatar basylym «Taıaýda bıznes salasyn qoldaýǵa jaýapty barlyq sheneýnikterin jınaǵan Reseı Prezıdenti Dmıtrıı Medvedev úlgi retinde Qazaqstandy atady: álemdik bıznes júrgizýdiń jeńildigi reıtınginde 180 eldiń ishinde Reseı 120-shy orynǵa deıin keri syrǵypty, al Qazaqstan 63-shi orynǵa kóterilgen. Múmkin Pýtın Úkimeti «tájirıbeńdi úıret» dep Másimov komandasyna qolqa salar, ony kóre jatarmyz», dep jazady.

Al atalǵan vedomstvonyń alqa májilisine toqtalǵan «Alash aınasy» gazetiniń jazýynsha, aldyn ala esepteýler boıynsha, ishki ónimniń naqty ósimi 1,1 paıyzdy quraǵan. Jalpy otandyq óndiris salasyndaǵy ósim 1,7 paıyzǵa deıin kóterilse, munaı-gaz óndirýdi arttyrýdyń arqasynda taý-ken óndirisiniń damý deńgeıi taǵy 6,1 paıyzǵa artqan. Alqa májilisinde aıtylǵan jaıttardy egjeı-tegjeıli bilgińiz kelse basylymnyń búgingi sanynda jaryq kórgen «Bıylǵy kózir - bızneste» degen maqalaǵa nazar aýdaryńyz.

«Astana aqshamy» gazeti óziniń senbilik nómirinde elorda ákimi Imanǵalı Tasmaǵambetovtiń qala turǵyndary aldyndaǵy eseptik kezdesýinde jasaǵan baıandamasyn jarııa etti. Sonymen qatar basylymnyń osy sanynan baıandamasyn aıaqtaǵannan keıin ákimniń elorda turǵyndarynyń saýaldaryna bergen jaýaptary da basylǵan. «Іrgeli istiń jetekshisi - jiger, synshysy - halyq» degen taqyryppen berilgen baıandamada el astanasynyń tynys-tirshiligine, mádenıetine, áleýmettik-ekonomıkalyq hal-ahýalyna qatysty jaıttar tolyǵymen qamtylǵan.

Osy basylymda QR Indýstrııa jáne saýda mınıstrligi «Halal» standarttaý tehnıkalyq komıtetiniń tóraǵasy Marat Sársenbaevpen aradaǵy suhbat «Búginde halal ónimin shyǵarýǵa kásipkerlerdiń kóbi yntaly» degen taqyryppen berilgen. Ekeýara áńgime barysynda komıtet tóraǵasy «2014 jyly tutynatyn azyq-túlik ónimderimizdiń 80 paıyzy otandyq ónimder bolatyn bolsa, sonyń 50 paıyzy halal ónim bolatyn shyǵar dep oılaımyn. Oǵan suranys ta, ynta da kóp» depti. Elimizdegi halal ónimderine qatysty maǵlumattar qyzyqtyrsa basylymda jarııalanǵan maqalaǵa nazar salyńyz.

***

«Aıqyn» gazetiniń dástúrli «Aq sóıle!» aıdarynyń búgingi qonaǵy - QR Parlamenti Májilisiniń depýtaty Vıktor Kııanskıı. Suhbat «Qazaqtan asqan baýyrmal halyq joq» degen taqyryppen jaryq kórdi. Ekeýara áńgime barysynda sóz bolǵan jaıttardy basylymnyń búgingi nómirinen oqı alasyzdar. «Qazaqtan asqan jaqsylyq tileýshi, baýyrmal halyq joq dep aıtar edim. Bul ulttyń qaıyrymdylyǵy, qonaqjaılylyǵy dastarhanynan kórinedi », deıdi Májilis depýtaty.

«Aqıqatynda dollar 135 teńgeden de arzandaıdy». Osy taqyryppen «Aıqyn» gazetinde jazylǵan maqalada qalyń buqara arasynda «dollar baǵasy ósip, ol 165 teńgege deıin kóteriledi eken» degen gý-gý áńgimege tosqaýyl qoıylǵan. «Qazaqstanda dollar qymbattaıdy dep dúrligýdiń qajeti joq», dep jazady basylym.

***

«Kazahstanskaıa pravda» gazetiniń jazýynsha, Qazaqstan men Norvegııa saıası, ekonomıkalyq jáne gýmanıtarlyq ózara qarym-qatynastarynyń deńgeıin jetildirýde. Bizdiń elimizge resmı saparmen kelgen Norvegııa Koroldiginiń Kron-hanzadasy Hokon Magnýs keshe Qazaqstan Prezıdenti Nursultan Nazarbaevpen kelissózderi barysynda Oslo halyqaralyq kún tártibine qatysty Astananyń bastamalaryn tolyǵymen qoldaıtyndyǵyn atap ótken.

Norvegııa Koroldiginiń Kron-hanzadasy Hokon Magnýstyń elimizge sapary jaıynda «Ekspress-K», «Lıter» basylymdarynda da keńinen jazylǵan.

«Qazaqstan 2010 jyly EQYU sammıtin Astanada ótkizýge senim bildirgenin qalaıdy. Osy aptada qazaqstandyq SІM basshysy Qanat Saýdabaev EQYU Іs basyndaǵy tóraǵasy retindegi Amerıka Qurama Shtattaryna saparyn aıaqtap, maqsatty jolyndaǵy eń qıyn tosqaýyldan ótti. AQSh qoldaýyna ýáde aldy», dep jazady «Novoe pokolenıe» gazeti.

Sonymen qatar basylym buǵan deıin elimizdiń bul bastamasyn Frantsııa, Italııa, Ispanııa, Túrkııa, Reseı jáne TMD-niń basqa da memleketteri, sonymen qatar Vendaǵy EQYU-nyń Turaqty keńesi men Rımdegi Vatıkannyń da qoldaǵanyn atap ótken.

Memlekettik hatshy - Syrtqy ister mınıstri Qanat Saýdabaevtyń AQSh-qa resmı sapary jaıynda «Kazahstanskaıa pravda», «Ekspress-K», «Lıter» basylymdarynda da maqalalar bar.