Konkı sporty: Qytaı men Reseı Qazaqstanǵa usynys jasady
ASTANA. Qazaqparat - Konkımen júgirýden Qytaı jáne Reseı sportshylary Qazaqstandaǵy áriptesterine matchtyq kezdesý formatyndaǵy týrnırler serııasyn ótkizýdi usynyp otyr, dep habarlaıdy QazAqparat tilshisi.
QR UOK-niń baspasóz qyzmeti taratqan málimetterge súıensek, jyl saıyn ótetin jarysqa jasóspirimder men úlken jastaǵy jetkinshekter qatysýy tıis. Týrnırdiń ataýy - «Uly Jibek joly».
Qazaqstan konkımen júgirý federatsııasy ókilderiniń aıtýynsha, atalǵan format buryn óte tanymal bolǵan. «Medeý» aıdynynda KSRO, GDR, Norvegııa quramalarynyń matchtyq kezdesýi júıeli túrde ótip turǵan. Mádenı jáne sporttyq sharalardy jańǵyrtý 2018/2019 jylǵy maýsymnyń sońyna josparlanýda. Alǵashqy jarysty Chelıabınsk, ekinshisin Astana qabyldaıdy. Al sońǵy kezdesý Qytaı qalalarynyń birinde ótpekshi.
Árbir kezeńde komandalyq eseptegi jeńimpazdy anyqtaý usynylýda. Jarys baǵdarlamasyna jeke qashyqtyqtardan bólek, komandalyq sprınt pen komandalyq jarys enýi múmkin.
Bul format eki sebep boıynsha qyzyqty. Konkımen jarysýda qandaı da bir jańa týrnır ótkizý - kóp kezdese bermeıtin oqıǵa. Ekinshi sebebi - usynylǵan jas deńgeıi. Astana óz sportshylaryn 2020 jyly ótetin Jasóspirimder Olımpıadasyna daıyndaýdy bastady. Daıyndyq kezinde jarystyń kóp ótýi sportshylarǵa qosymsha kúsh bereri sózsiz.
Aıta keteıik, Norvegııanyń Lıllehammer qalasynda ótken Jasóspirimderdiń qysqy Olımpıadasynda qazaqstandyq sportshylar tórt júlde jeńip aldy. Tórt júldeniń úsheýin konkıge qatysy bar sportshylar ıelengen bolatyn. Elızabet Tursynbaev mánerlep syrǵanaýdan qola medal ıelense, short-trek pen konkıden aralas komandalyq jarysta sportshylarymyz júldege qol jetkizdi.
