Komsomoldyń qurylǵan kúnine oraı QazUÝ-de kezdesý ótkizildi
ALMATY. Qazannyń 29-y. QazAqparat /Erbol Azanbek/ - Búgin - Komsomoldyń qurylǵan kúni. Osyǵan oraı Ál-Farabı atyndaǵy QazUÝ-de ýnıversıtettiń ár jyldary komsomol komıtetin basqarǵan túlekteri bas qosty,
dep habarlaıdy QazAqparat.
Kezdesýge jınalǵan 11 komsomol jetekshisin ýnıversıtet rektory Baqytjan Jumaǵulov qarsy alyp, qaıta jóndeýden ótip, jaqynda ashylǵan ýnıversıtet murajaıymen tanystyrdy. Ýnıversıtettiń 75 jyldyq merekelik medalimen marapattady, baǵaly syılyqtar tapsyrdy.
Ýnıversıtet rektorynyń aıtýynsha, bul kezdesýdiń basty maqsaty - qazirgi jastardy komsomoldyń jaqsy jaqtarynan habardar etý, patrıottyq tárbıe men eńbek súıgishtikke shaqyrý. Kezdesýge jınalǵan 11 komsomol jetekshisiniń qatarynda belgili ǵalym-akademıkter Saǵyndyq Satybaldın, Rahman Alshanovtar bar. Júzdesý barysynda burynǵy jetekshiler komsomoldyq ómir týraly estelikter aıtyp, ýnıversıtettiń 75 jyldyq merekesimen qutyqtady.
Akademık Saǵyndyq Satybaldınniń sózine qaraǵanda, keńestik komsomol jastardy tárbıeleýdiń, keńestik ıdeologııany júzege asyrýdyń myqty quraly bolǵan.
«Bárimiz osy uıymǵa múshe bolýdan, basqarýdan azamat retinde, tulǵa retinde qalyptasýǵa múmkindik aldyq. Sportpen aınalystyq, barlyq sharalarda júrdik. Bul bizge tek jetistikter alyp keldi. Sondyqtan qazirgi jastardy da osy rýhta tárbıeleý úshin jastar uıymdarynyń orny zor», dedi akademık.
