Kómirsýtekterdi barlaý jáne óndirý úshin az zerttelgen aýmaqtardyń tizbesi bekitildi
ASTANA. KAZINFORM – Energetıka mınıstrligi Indýstrııa jáne qurylys mınıstrligimen birlesip, kómirsýtekterdi barlaý jáne óndirý maqsatynda az zerttelgen aýmaqtar basseınderi shegindegi jer qoınaýy ýchaskelerinde jer qoınaýyn paıdalaný quqyǵyn berýge arnalǵan aýmaqtar ýchaskeleriniń tizbesin bekitti.
Bul jer qoınaýyn paıdalaný salasyndaǵy reformalardy iske asyrý jáne geologııalyq barlaýǵa ınvestıtsııalar tartý úshin qolaıly jaǵdaılar jasaý jolyndaǵy kezekti qadam boldy.
Qazaqstan Respýblıkasynyń «Jer qoınaýy jáne jer qoınaýyn paıdalaný týraly» kodeksine alǵash ret «az zerttelgen aýmaqtar» uǵymy engizilip, sondaı-aq osyndaı ýchaskelerde jer qoınaýyn paıdalaný quqyǵyn berý tetigi bekitildi. Zańnamalyq reformalar geologııalyq turǵydan jetkilikti zerttelmegen, biraq jańa kómirsýtek ken oryndaryn ashýdyń áleýeti joǵary perspektıvaly aýmaqtardy ıgerýge tartýǵa baǵyttalǵan.
Bekitilgen tizbe ınvestorlarǵa oǵan engizilgen perspektıvaly ýchaskeler boıynsha jer qoınaýyn paıdalaný quqyǵyn berýdi óz betinshe bastamashylyq etýge múmkindik beredi. Ol úshin múddeli tulǵa tańdalǵan jer qoınaýy ýchaskesi boıynsha aýktsıon ótkizý týraly ótinishpen Energetıka mınıstrligine júginedi.
Jer qoınaýy kodeksine sáıkes ótinish qysqartylǵan merzimde — 10 jumys kúni ishinde qaralady. Bas tartýǵa negizder bolmaǵan jaǵdaıda kelesi 5 jumys kúni ishinde aýktsıon ótkizý týraly habarlama jarııalanady.
Jer qoınaýyn paıdalaný quqyǵy tek ashyq aýktsıon qorytyndysy boıynsha beriledi. Qol qoıý bonýsynyń eń joǵary mólsherin usynǵan qatysýshy jeńimpaz dep tanylady jáne onymen kómirsýtekterdi barlaý men óndirýge arnalǵan úlgilik kelisimshart jasalady.
Úlgilik kelisimshart geologııalyq barlaý jumystarynyń eń tómengi baǵdarlamasyn mindetti túrde oryndaýdy kózdeıdi. Atap aıtqanda, jer qoınaýyn paıdalanýshy alǵashqy úsh jyl ishinde ýchaske aýmaǵynyń keminde 30%-ynda eki ólshemdi seısmıkalyq barlaý jumystaryn júrgizýge, al kelesi úsh jyl kezeńinde keminde bir barlaý uńǵymasyn burǵylaýǵa mindetti.
Mundaı tásil perspektıvaly aýmaqtarda naqty geologııalyq barlaý jumystaryn júrgize otyryp, jer qoınaýyn paıdalaný quqyǵyn berýdiń ashyq ári aıqyn tetigin qamtamasyz etedi. Bul kómirsýtek resýrstyq bazasyn tolyqtyrýǵa jáne eldiń munaı-gaz salasyn odan ári damytýǵa yqpal etedi.
Jańa tetikti engizý geologııalyq táýekeli joǵary jaǵdaılarda iske asyrylatyn jobalardyń erekshelikterin eskerip, jańa ken oryndaryn izdeýge ınvestıtsııa salýǵa daıyn ınvestorlar úshin qosymsha yntalandyrýlar qalyptastyrady. Atalǵan ózgeristerdi iske asyrý geologııalyq barlaý jumystaryn jandandyrýǵa, sondaı-aq Qazaqstannyń mıneraldyq-shıkizat bazasyn keńeıtýge múmkindik beredi.
Mınıstrlik geologııalyq barlaý jumystaryn belsendi júrgizýge daıyn ınvestorlardy jan-jaqty qoldaıtynyn bildiredi jáne kómirsýtekterdi barlaý jáne óndirý úshin az zerttelgen aýmaqtardyń bekitilgen tizbesimen tanysyp, perspektıvaly jobalardy odan ári iske asyrýǵa múmkindik bar ekenin atap ótedi.
Aıta ketelik eldegi Aqsoran ken ornynda volfram óndirý 2028 jylǵa josparlanǵan.
