Kómirsýtek salasynda quqyq buzǵandarǵa 50 mlrd teńge aıyppul salyndy
ASTANA. KAZINFORM — Kómirsýtekter salasyndaǵy jer qoınaýyn paıdalanýshylar kelisimsharttardy oryndamaǵany úshin aıyppul tóleıdi. Bul týraly Energetıka mınıstrligi málim etti.
Vedomstvonyń málimetinshe, búginde elimiz boıynsha kómirsýtekter salasyndaǵy jer qoınaýyn paıdalanýǵa arnalǵan kelisimsharttardyń jalpy sany — 327, onyń ishinde barlaý boıynsha — 133, daıyndyq kezeńinde — 12, óndirý boıynsha — 182.
QR Energetıka mınıstrligi 2025 jylǵy 1 maýsymnan bastap qoldanystaǵy zańnamaǵa sáıkes kómirsýtekter salasyndaǵy jer qoınaýyn paıdalanýshylardyń kelisimsharttyq mindettemelerdi oryndaýyn monıtorıngileý boıynsha keshendi jumys júrgizdi.
— Júrgizilgen jumys nátıjesinde salynǵan aıyppuldar men bereshekterdiń jalpy somasy 50 mlrd teńgeni qurady, onyń ishinde 2024 jyl boıynsha — 19 mlrd teńge. Jer qoınaýyn paıdalanýshylardyń atyna 160-tan astam habarlama joldandy, — delingen habarlamada.
Qazirgi tańda shamamen 1 mlrd teńge óteldi, bul baǵyttaǵy jumys jalǵasýda. Sondaı-aq, Mınıstrlikpen aǵymdaǵy jyldyń 9 aıynda jer qoınaýyn paıdalaný boıynsha 11 kelisimsharttyń kúshi joıyldy.
Aıta keteıik, jer qoınaýyn paıdalanýshylar otandyq óndirýshilermen uzaq merzimdi sharttar jasasty.